Հինգ տարին մեկ երեք ամսով ծառայության մասին Փաշինյանի հայտարարությունը դիտարկում եմ որպես նախընտրական քարոզարշավի շրջանակում արված հայտարարություն. ռազմական փորձագետ

Ռազմական փորձագետ Կարեն Հովհաննիսյանը ArmDaily.am-ի հետ զրույցում ասաց, որ Նիկոլ Փաշինյանի կողմից արված հայտարարությունը, որ այդպիսի գաղափար կա զինծառայությունը դարձնել հինգ տարին մեկ երեք ամսով, փորձագետը նշեց, որ այս հայտարարությունը փոքր-ինչ լղոզված է, քանի որ պարզ չի, թե իրականում ինչ է ասում և ինչ է ուզում։
«Հասկանալի չի,թե իր խոսքը պայմանագրայիններին է վերաբերում, ժամկետայիններին է վերաբերվում ընդհանրապես, թե ՄՈԲ-ին։ Եթե այն վերաբերվում է ժամկետայիններին, ապա ես փորձում եմ այն դիտարկել որպես նախընտրական քարոզչության շրջանակներում և հետպատերազմյան շրջանին բնորոշ ծանր հոգեբանական վիճակում գտնվող ծնողների համար։ Կարծես թե ականջահաճո բան է այն, որ այ, որդիս էլ չի ծառայի կամ քիչ կծառայի։ Այսինքն, այն ծնողների կամ այն մարդկանց համար, ովքեր ամեն գնով փորձում են իրենց որդիներին Հայաստանից դուրս հանել, որպեսզի ծառայության դուրս չգնան, այս համատեքստում եմ ես փորձում դիտարկել։ Բայց, այնուամենայնիվ, այն բավականին վտանգավոր է, որովհետև և Թուրքիան, և Ադրբեջանը ավելացնում են իրենց ռազմնական ծախսերը՝ նույնիսկ իրենք նոր մարդկային ներուժ են ներգրավում բանակում, այսինքն ավելացնում են մարդկային ներուժը բանակում և այդ ֆոնի վրա խոսել կամ շոշափել տրամադրությունները՝ բանակ չունենա, ճիշտն ասած բառեր չեմ գտնում, որպեսզի մեկնաբանեմ սա»,-ասաց ռազմական փորձագետը։

Հովհաննիսյանը շեշտեց, որ սա հավասարազոր է ինքնասպանության, որովհետև շատ կարճ տեսանելի ապագայում մենք այլևս ընդհանրապես Հայաստանի Հանրապետություն պետություն չենք ունենա։

Ինչ վերաբերում է Սյունիքում ռուսական ռազմաբազա ունենալու անհրաժեշտության մասին վարչապետի հայտարարությանը, Կարեն Հովհաննիսյանն ասաց. «Դա ևս սխալ է, մենք պետք է ունենանք մեր ազգային բանակը և համագործակցենք ինչու չէ Ռուսաստանի հետ, Հունաստանի հետ, բայց պաշտպանությունը հանձնել մեկ այլ պետության, որը այդ պահին իր քաղաքական կամ տնտեսական շահերից ելնելով կպաշտպանի, կամ չի պաշտպանի՝ դա արդեն անհեռատեսություն է և անհեռատես քաղաքականություն է»։