Լենա Նազարյանը երևի կամ չի հասկանում կամ տեղյակ չի Թուրքիայի՝ Հայաստանի հանդեպ որդեգրած դիրքորոշումից. թուրքագետ
ՔԱՂԱՔԱԿԱՆՈՒԹՅՈՒՆ
Լենա Նազարյանը երևի կամ չի հասկանում կամ տեղյակ չի Թուրքիայի՝ Հայաստանի հանդեպ որդեգրած դիրքորոշումից: Այդ դիրքորոշումը անկախության առաջին իսկ օրից մնացել է նույնը: Այս մասին ArmDaily.am-ի հետ զրույցում ասաց թուրքագետ Հակոբ Չաքրյանը:
Նա նշեց, որ 20–րդ դարի սկզբին մի անգամ Ցեղասպանություն իրագործել են հայերի նկատմամբ ու Թուրքիայի նախագահը հիմա էլ չի թաքցնում իր այդ մտադրության մասին, հայտարարում է, որ մտադիր է նոր Ցեղասպանություն իրագործել հայերի դեմ: Չաքրյանը շեշտում է, որ Էրդողանի այդ հայտարարությունից հետո Պուտինը նրան հռչակել է իր լավագույն ընկերը:
«Լենա Նազարյանից առաջ կարծեմ Արա Այվազյանն ու Արմեն Գրիգորյանն էլ են նմանատիպ հայտարարություններով հանդես եկել: Այդ միտումը կար ի դեպ, պարզապես Լենա Նազարյանն ավելի հստակեցրել է: Ես կարծում եմ, որ խնդիրը ոչ Լենա Նազարյանն է, ոչ Գրիգորյանը, ոչ էլ Արա Այվազյանը: Փաշինյանն էլ իր ելույթում խոսում էր, որ հաղորդակցության ուղիները պետք է բացվեն: Թուրքերը միշտ մեզ թշնամի են համարել ու Ցեղասպանությունն էլ իրագործելիս հո բարեկամաբար տրամադրված չէին, հիմա էլ շարունակելու են: Էրդողանի այդ հայտարարությունը լրիվ լկտիություն էր, նաև մարդկության դեմ հանցագործություն, որովհետև ՄԱԿ-ի Ցեղասպանությունների կանխարգելման և պատժման կոնվենցիաներով հոդված էլ կա այդ մասին, հանցագործություն է մարդկության դեմ հանցագործություն քարոզելը, իսկ դա չի քարոզում՝ մտադրություն է հայտնում, Պուտինն էլ, նրան հռչակելով իր լավագույն ընկերը, մասնակից է դառնում այդ հանցագործությանը»,-ասաց Չաքրյանը:
Թուրքագետը հարցադրում է անում, որ եթե հայ զինվորների աճյունները տեղափոխող մեքենաներն են քարկոծում ռուսական խաղաղապահ ուժերի աչքի առջև, հաղորդակցության ուղիների բացման դեպքում ով պետք է ապահովի դրանց անվտանգությունը: ԻՆչ վերաբերում է Թուրքիայի աչքերով կառուցողական Հայաստանի տեսլականին, Չաքրյանը նշում է. «Թուրքերը շատ լավ գիտեն, որ Պուտինը հայաստանյան իշխանություններին կաթվածահար է արել, հիմա էլ ահաբեկում է Իլհամի ձեռքով՝ Իլհամը դարձել է նրա ձեռքին Հայաստանի ահաբեկման միջոց, որ Հայաստանը վերածվի կամազուրկ պետության՝ Հայաստանին պայմանները թելադրելու համար պայմանները շատ նպաստավոր են: Թուրքերն էլ ուզում են այդ նպաստավոր պայմաններից օգտվել, իրենք էլ են Հայաստանի հետ հարաբերությունների բարելավման միտումներ դրսևորում: Բացի այդ բարենպաստ պայմաններից՝ առջևում էլ ապրիլի 24-ն է: Ամեն տարի ապրիլի 24-ին ընդառաջ նրանք այդպիսի միտումներ են դրսևորել՝ հիմա առավել ևս են դրսևորում, քանի որ Հայաստանի իշխանություններն ու Հայաստանը կաթվածահար վիճակում են»,-ասաց թուրքագետը:
Նա նշում է, որ հայերը երբեք թշնամություն չեն դրսևորել Թուրքիայի նկատմամբ, մեր սահմանը մենք չենք փակել, այն փակ չէ նաև հիմա, այդ թուրքերն են փակել այդ սահմանը:
«Թուքերն են փակել՝ թող իրենք էլ բարի լինեն, ուզում են բացեն, չեն ուզում՝ թող չբացեն, մենք դրանից առանձնապես որևէ բան չենք ստանում: Կարող են բռնել հեղեղել գործարարներով, շինարարության ընկերություններով, բանկերով, ֆինանսիստներով և մենք արդեն կկորցնենք պետականության հատկանիշները: Մենք արդեն կդառնանք կամազուրկ ժողովուրդ»,-ասաց Հակոբ Չաքրյանը:
Նա հավելեց, որ անընդհատ Թւորքիայի հետ մերձեցման, թշնամանքը վերցնելու, բարեկամանալու միտումները, համագործակցելու՝ դա խոչընդոտ կհանդիսանա Վաշինգտոնի համար, Բայդենի համար:
«Փաստորեն, եթե նա ճանաչի Ցեղասպանությունը, թուրքերը պիտի սկսեն մեղադրել Բայդենին, թե Հայաստան-Թուրքիա հարաբերությունները խոչընդոտում է: Եթե Բայդենը որոշել է ճանաչել Ցեղասպանությունը՝ նա կճանաչի»,-եզրափակեց Չաքրյանը:
