Տպավորություն է, որ ԳՇ նոր պետին նշանակել են բանակը ամբողջությամբ կազմաքանդելու նպատակով. Մովսես Հակոբյան

Սահմանադրության այն կետը, որը վերաբերում է բանակի անձնակազմի՝ քաղաքական հարցերին չխառնվելուն, վերաբերում է նաեւ բանակի գերագույն հրամանատարին, այսինք՝ վարչապետին։ Վերջինս չի կարող քաղաքական նպատակներով պաշտոնից ազատել պաշտոնյաներին: Այս մասին հրավիրված մամուլի ասուլիսի ժամանակ, անդրադառնալով ԶՈՒ ԳՇ-ի հայտարարությանը, ասաց ԳՇ նախկին պետ Մովսես Հակոբյանը։

«ԳՇ-ի հայտարությունը հաջորդել է ԳՇ պետի առաջին տեղակալ Տիրան Խաչատրյանի պաշտոնանկությանը։ Հարց է առաջանում՝ ԳՇ պետի առաջին տեղակալը ինչի՞ համար է ազատվել, հանցագործությո՞ւն է կատարել, հայրենի՞ք է դավաճանել, պարտականությունները թերի՞ է կատարել։ Որեւէ հիմք չկար նրան ազատելու։ Տիրան Խաչատրյանի ազատումը քաղաքական բնույթ ուներ: Այդ դեպքում, եթե բանակը չպետք է զբաղվի քաղաքականությամբ, ուրեմն պետք է նաև քաղաքականությունը չբերել բանակ»,- ասաց Հակոբյանը:

Անդրադառնալով Օնիկ Գասպարյանի ազատման իրավական հիմքերին՝ Մովսես Հակոբյանը հիշեցրեց ներքին ծառայության կանոնագրքի մասին:

«Զինծառայության մասին օրենքը սահմանում է՝ վարչապետը իրավունք ունի նշանակելու եւ ազատելու ԳՇ պետին: Այստեղ հարց է առաջանում, թե որոնք են ազատման հիմքերը։ Եթե Օնիկ Գասպարյանը հանցագործ է կամ վատ է աշխատում, ապա թող ապացուցեն, եթե նրա հայտարարությունը քաղաքական է, ապա քրեական գործ թող հարուցեն: Անգամ ծառայողական քննություն չի անցկացվել։ Զինվորականները առաջնորդվում են ներքին ծառայության կանոնագրքով, որի առաջին գլխում այսպիսի կետ կա։ Եթե զինվորական օրենքները հակասում են միմյանց, ապա ներքին ծառայության կանոնագիրքը գերակա է մնացած օրենքների նկատմամբ։ Եւ այստեղ միանձնյա ղեկավարման սկզբունքը չպետք է խաթարվի։ Զինվորականը հրամանը կատարում է, ապա նոր բողոքարկում։

Եթե վաղը բողոքարկեն, որ Օնիկ Գասպարյանի դեմ օրենքը կիրառվել է անօրինական, այն օրենքը հետադարձ ուժ չի ունենա: Որեւէ մեկը չի կարող վերադառնալ այդ պաշտոնին: Օրենքը պահանջում է, որ այն անձը, որը կիրառել է անօրեն հրաման, կարող է ենթարկվել պատասխանատվության»,- մանրամասնեց Հակոբյանը:

Խոսելով Արտակ Դավթյանի նշանակման մասին՝ Մովսես Հսկոբյանը հիշեցրեց, որ ԳՇ նորանշանակ պետի թեկնածությունը այդքան էլ ցանկալի չէր իր համար:

«Ես մի անգամ էլ եմ ասել, որ տպավորություն է՝ Արտակ Դավթյանին նշանակել են ապացուցելու համար, որ 44-օրյա պատերազմից հետո բանակը քանդված չէ եւ նշանակել են, որ ամբողջությամբ քանդվի»: