Հայոց ցեղասպանության նահատակները մնում են մեր խղճին ու ապրում մեր կյանքում. Լիբանանի նախագահի ներկայացուցիչ

Հայոց ցեղասպանության նահատակները մնում են մեր խղճին ու ապրում մեր կյանքում, այսօր և մեր ապագայում: Այս մասին Ծիծեռնակաբերդում հայտարարեց  Լիբանանի Հանրապետության Վսեմաշուք նախագահ զորավար Միշել Աունի ներկայացուցիչ, Նորին գերազանցություն նախարար Վարդինե Օհանյանը:

«Նրանք հայտարարում են, որ Աստված կոչվում է խաղաղության աստված, այլ ոչ թե անարդարության, գաղութատիրության և բռնության աստված: Նրանց հետ մենք մերժում ենք անձնատուր լինելը մահվան դատավճռին: Նրանք նահատակվեցին, բայց շարունակեցին խոսել հոգով: Եվ ահա նրանք, ավելի քան մեկ դար անց, վերանորոգում են երկրի երեսը: Հայ և լիբանանցի ժողովուրդների միջև մեկից ավելի ընդհանուր հայտարար կա՝ հատկապես տանջանքի, զոհաբերության ու տառապանքի մեջ: Դուք սրով եք սպանվել, մենք սպանվել ենք սովից ու շրջափակումից, իսկ հանցագործը մեկն է: Այս ճանապարհին միասնաբար մենք մերժում ենք, հանուն մարդկության, կեղծիքը, ավերումն ու ճշմարտության քողարկումը: Այսօ՛ր, այսօ՛ր, կոչ ենք անում լինել միասին, այս գործուն ճշմարտությունը, որի շնորհիվ մենք ազատագրվում ենք ամեն տեսակի վախից ու լինում առավել ուժեղ ամեն տեսակի ենթակայությունից»,-մանրամասնեց նա:

Վարդինե Օհանյանն ընդգծեց, որ լիբանանահայկական հարաբերություններն ամրապնդվել են հատկապես մարդկային մակարդակում, երբ անցյալ դարասկզբին՝ պատմության ցավալի ժամանակահատվածում, հարյուրհազարավոր հայեր, հայ ժողովրդի դեմ կազմակերպված ջարդերի թիրախ դառնալով, հաստատվեցին Լիբանանի հողերում:

«Այստեղից՝ այս պատմական վայրից ու այս պատմական պահից, եկեք այնպես անենք, որ աշխարհը զերծ մնա մեծամասնության ու փոքրամասնությունների գոյության մասին զգացումներից: Մենք բոլորս փոխկախված ենք ու եղբայրներ, որովհետև մենք միասին բախվում ենք ընդհանուր մարտահրավերների, և յուրաքանչյուրս իր ձևով է տուժում այդ հետևանքներից: Լիբանանի որդիներից՝ իր քրիստոնյաներով ու մահմեդականներով, հայազգի որդիներին՝ Հայաստանի Հանրապետությունում, Լիբանանում և աշխարհում, Լիբանանի Հանրապետության նախագահ Նորին գերազանցություն զորավար Միշել Աունը վերահաստատում է իր համերաշխությունն ու գնահատանքը հայ ժողովրդի՝ ամուր հավատքով խարսխված վկայությունը, որը շարունակվում է մարդկային քաղաքակրթությունում»,-ընդգծեց նա: