ՀՀ–ն խիստ շահագրգռված է ՌԴ–ից Սու-30ՍՄ և այլ սպառազինության մատակարարման հարցում․ Փաշինյան
ՔԱՂԱՔԱԿԱՆՈՒԹՅՈՒՆ
Հայաստանը ցանկություն ունի Ռուսաստանի հետ լայն և երկարաժամկետ ռազմատեխնիկական համագործակցության։ Այս մասին ապրիլի 7-ին դեպի Մոսկվա սպասվող աշխատանքային այցի նախաշեմին «Ինտերֆաքսին» տված հարցազրույցում նշել է ՀՀ վարչապետ Նիկոլ Փաշինյանը։
«Հայաստանը միտված է Ռուսաստանի Դաշնության հետ լայն և երկարաժամկետ ռազմատեխնիկական համագործակցության, ինչը բխում է երկու պետությունների երկարաժամկետ ռազմավարական շահերից»,-ասել է Փաշինյանը:
ՀՀ վարչապետը նշել է` հաշվի առնելով, որ Հայաստանի տարածքում ստեղծվել և գործում են (միջպետական երկկողմ համաձայնագրերին համապատասխան՝ հայ-ռուսական երկու խմբավորում) զորքերի միացյալ խմբավորումը և Հավաքական անվտանգության կովկասյան տարածաշրջանում հակաօդային պաշտպանության միացյալ տարածաշրջանային համակարգը, և երկու երկրները ՀԱՊԿ-ի կազմում են, «հասկանալի է, որ Հայաստանը խիստ շահագրգռված է Ռուսաստանից մատակարարումների հարցում, որպեսզի ունենա ժամանակակից և համատեղելի, առաջին հերթին՝ Ռուսաստանի Դաշնության և ՀԱՊԿ մյուս դաշնակիցների հետ, սպառազինություն և զինամթերք։
Նրա խոսքով՝ Երևանը շահագրգռված է, որ սպառազինության և զինամթերքի մատակարարումը Հայաստան իրականացվի նույն կոմպլեկտավորմամբ, ինչ և Ռուսաստանի ԶՈւ-ի համար:
Հարցին, թե նախատեսո՞ւմ է արդյոք Հայաստանը շարունակել ռուսական զենքի, մասնավորապես՝ Սու-30ՍՄ կործանիչների և այդ ինքնաթիռների համար սպառազինության գնումները, ՀՀ վարչապետը դրական է պատասխանել։
«Դրական կպատասխանեմ, քանի որ դրանք ժամանակակից բազմաֆունկցիոնալ կործանիչներ են, և դրանց ձեռքբերումը նախատեսված է ինչպես մեր երկկողմ պայմանագրային փաստաթղթերով, այնպես էլ ազգային զինված ուժերի զարգացման ծրագրով»,-ասել է Փաշինյանը։
