Մեղրին պետք է պահենք «Իսկանդեր»-ով թե առանց «Իսկանդեր», «Սմերչ»-ով թե առանց «Սմերչ», ՀՕՊ-ով թե առանց ՀՕՊ. Արմեն Այվազյան

Հայ ծնողներին առաջարկում եմ իրենց նորածինների անձնանունը որոշելիս՝ դիտարկել նաև ՄԵՂՐԻԿ չքնաղ հայկական անունը։ Շուրջ բոլորը՝ հարազատ, թշնամի թե դաշնակից թող հասկանան Մեղրիի անգնահատելի արժեքն ու նշանակությունը Հայաստանի և հայ ժողովրդի համար։

Մեղրին պետք է պահենք «Իսկանդեր»-ով թե առանց «Իսկանդեր», «Սմերչ»-ով թե առանց «Սմերչ», ՀՕՊ-ով թե առանց ՀՕՊ։ Պետք է պահենք։ Հանկարծ օտարի դրածոները չասեն, թե, հա՜յ-հու՜յ, նահանջեցինք, «որովհետև 25-30 հազար զինվոր շրջապատման մեջ կընկներ ու կոչնչացվեր»։

Մեղրին ու Սյունիքը պահելու համար հայ ժողովուրդը պատրաստ պետք է լինի ինչպես թշնամու, այնպես էլ իր իսկ սեփական արյան ծովեր ու օվկիանոսներ հեղել։ Մնում է ՊՆ-ում ու ԳՇ-ում որոշումն ընդունվի, որ Մեղրին և առհասարակ Սյունիքը պետք է պահենք, ընդ որում՝ սեփական ուժերով ու ԻՆՉ ԳՆՈՎ ԷԼ ԼԻՆԻ՛։ Պաշտպանության ձևերն ու միջոցները կան։ Եթե չգիտեն (պարզվեց, շա՜տ բան չգիտեն), թող մեկ անգամ գոնե հարցնեն։

Մեղրիի գունդը պետք է դառնա Հայաստանի լավագույն զորամասերից մեկը, եթե ոչ լավագույնը։ Ցավալիորեն, եթե հիշում եք 2019 թ. մարտի 19-ի զինվորական զանգվածային կարգազանցության դեպքը, հե՛նց այդ զորամասը վատագույններից էր (արդյո՞ք պատահականորեն և արդյո՞ք այժմ իրավիճակը շտկվել է)։ Եվ թող գեներալները գիշերները չքնեն, թող մտածեն այս հարցերի մասին, թող անսովոր և արդյունավետ լուծումներ գտնեն։

Հ. Գ. Պատմությունից ինձ հայտնի է ընդամենը մեկ դեպք, երբ երեխային Մեղրիկ են անվանակոչել ի պատիվ Մեղրի քաղաքի։ Դա եղել է 1736 թ. գարնանը, երբ Աբրահամ Կրետացի կաթողիկոսը պարսկական գերությունից բազում հայերի էր կարողացել ազատել («զոմանս թանկագին, զոմանս աժանագին»), այդ թվում՝ դեռևս իրենց տներում և իրենց ամուսիններից հղիացած կանանց. «Կային եւ կանայք յղիք ի միջի իւրեանց՝ յղիացեալք ի տանց եւ յարանց իւրեանց, քանզի Է (7) ամիս էր գերութիւնք նոցա»։

Աբրահամ կաթողիկոսը նրանց Մուղանից ուղարկում է պատերազմից հարաբերականորեն քիչ տուժած Ագուլիս և Աստապատ քաղաքները։ Ճանապարհին այդ հղի կանանցից մեկը ծննդաբերում է Մեղրիում և այդ առթիվ էլ երեխայի անունը դնում են Մեղրիկ

(տե՛ս Աբրահամ Կրետացի, Պատմութիւն: Աշխ.` Ն. Կ. Ղորղանյանի, Երևան, 1973, էջ 132)»։