Ուղիղ 29 տարի առաջ ստեղծվեց Պաշտպանության կոմիտե, կառույցի ղեկավար նշանակվեց Սերժ Սարգսյանը. Հասրաթյան
ՔԱՂԱՔԱԿԱՆՈՒԹՅՈՒՆ
Ուղիղ 29 տարի առաջ՝ 1992թ. մարտի 26-ին ԼՂՀ նախարարների խորհրդին առընթեր ստեղծվեց Պաշտպանության կոմիտե, որն ավելի ուշ վերանվանվեց Ինքնապաշտպանության ուժերի կոմիտե: Այս մասին Facebook-ի իր էջում գրել է Արցախի ՊԲ նախկին խոսնակ Սենոր Հասրաթյանը:
Նա, մասնավորապես, հավելել է. «Կառույցի ղեկավար նշանակվեց Սերժ Ազատի Սարգսյանը: Կոմիտեն ձևավորվեց պատմական մի այնպիսի ժամանակահատվածում, երբ Արցախը ոչ միայն գտնվում էր շրջափակման օղակի մեջ, այլև հանրապետության տարածքում եղած ադրբեջանաբնակ գյուղերը վեր էին ածվել ռազմական հենակետերի և ամենօրյա ռեժիմով հրետանային ու հրաձգային զինագեսակներից կրակի տակ էին պահում մայրաքաղաք Ստեփանակերտն ու հարակից խաղաղ բնակավայրերը:
Ցավալի է, որ այսօր այդ անհատներին թիրախավորում են նրանք, ովքեր ժամանակին ոչ միայն խուսափում էին Հայրենիք պաշտպանելուց, այլև այդ հաղթանակից 24 տարի անց տվել են Հայրենիքի մեծ մասը»:
