Հերիք եղավ, բոլ եղավ գործ անելու տպավորություն ստեղծելով գնան տուն․ Ռուբեն Մելիքյանը՝ ընդդիմադիր պատգամավորների մասին
ՔԱՂԱՔԱԿԱՆՈՒԹՅՈՒՆ
Նախագիծը հնարավորություն է տալիս ուղիղ միջամտել արդարատության համակարգին։ Այս մասին այսօր՝ մարտի 19-ին, Բաղրամյան պողոտայում լրագրողների հետ զրույցում նշեց իրավապաշտպան Ռուբեն Մելիքյանը՝ անդրադառնալով իշխող խմբակցության օրենսդրական փաթեթին, որով առաջարկվում է, որ ԲԴԽ-ն իրավունք ունենա ընդունելու իրավական-նորմատիվ ակտեր:
«Այս նախագիծը ես դիտարկում եմ օրեր առաջ Ազգային ժողովի փոխխոսնակի կողմից շատ ցինիկ ձևով արտահայատված «դատարանները վերցնելու» նպատակի ներքո։ Այս նախագիծը սահմանդրության կոպտագույն խախտումներն է իրենից ներկայացնում։ Ո՞վ է տեսել, որ դատավորը գործ քննի և ինչ-որ մարմին՝ թեկուզ Բարձրագույն դատական խորհուրդը, ընթացքում որոշի, որ այդ գործը դատավորից վերցնում է։ Դատարանը, երբ սկսում է արդարադատության իրականացում, պետք է ավարտի արդարադատության իրականացումը։ Այս նախագիծը հնարավորություն է տալիս արդարատության համակարգին ուղիղ միջամտել, երկրորդ՝ փաստաբանների հնարավորությունները էապես սահմանափակվում են, որովհետև դատարանները կարող են որոշել, որ նրանք այլևս չեն կարող միջնորդություններ ներկայացնել, բացարկներ հայտնել և այլն։ Երրորդը՝ փաստորեն ամեն մի դատավոր մի փաստաբան պետք է վարձի և իր կողքին դնի, քանի որ քաղաքացիներն անընդհատ կարող են դիմել ԲԴԽ-ին և դատարանն անընդհատ պետք է ինչ-որ մեկի առջև բացատրի իր գործողությունները։ Այսօր կան ֆիլտրներ՝ Արդարադատության նախարարությունը, դատավորների ընդհանուր ժողովի հանձնաժողովը»,- ասաց Ռուբեն Մելիքյանը։
