«Իմ քայլը» խմբակցության պատգամավորները մի փոքր զուսպ պետք է լինեին
ՔԱՂԱՔԱԿԱՆՈՒԹՅՈՒՆ
Ազգային ժողովում «Իմ քայլի» պատգամավորները Ռուբեն Վարդազարյանից երկու ժամից ավելի պարզաբանում էին պահանջում, թե ինչո՞ւ է նոյեմբերի 15-ին քաղաքական հայտարարությամբ հանդես եկել՝ լինելով ԲԴԽ նախագահ: Սակայն նա ասաց, որ քաղաքական հայտարարություն չի արել և կտրուկ հրաժարվեց պատասխանել այդ մասին պատգամավորների հարցերին: Այս թեմայով 1or.am զրուցել է իրավապաշտպան Արտակ Կիրակոսյանի հետ։
- Պարոն Կիրակոսյան, ինչպե՞ս եք գնահատում Ռուբեն Վարդազարյանի վարքագիծը:
— Կարելի է ընդգծել, որ դատական իշխանությունը իշխանության առանձին ճյուղն է, որը որ պետք է որոշակի հարգանք ներշնչի։ Դատական իշխանությունը համազոր է կառավարությանը և այդ տեսակետից պետք է այդ քննարկումը ԱԺ-ի կողմից այդքան ագրեսիվ չլիներ։ Եթե խոսենք բուն հայտարարությունից, ապա ես կարծում եմ, որ հայտարարության մեջ որևէ արտառոց բան չկար ու ավելին, ես կարծում եմ, որ եթե վարչապետի այն խոսքերին, որի վերաբերյալ ԲԴԽ նախագահը արտահայտվել էր ավելի մեղմ էր, քան երևի թե սպասելի էր։
- Վարդազարյանն ասաց նաև, որ այսօր դատական համակարգն անկախ է: Ձեր կարծիքով իսկապես այսօր անկախ է։
— Գիտեք, դատական իշխանությունը երկու տեսակի կախվածություն ուներ՝ մեկը օրենսդրական էր, որը կարծում եմ վաղուց մեծամասամբ լուծվել է, մյուս կողմից էլ մի խնդիր կար, որը կարծում եմ շատ կարևոր է, այն է, ընդհանուր այդ քրեաօլիգարխիկ համակարգում, որտեղ, որ կոռուպցիան շատ մեծ դեր ուներ լծակներ կար դատավորների վրա ազդելու իրենց ունեցած բիզնեսների կամ իրենց մտերիմների ունեցած բիզնեսների միջոցով։ Այսինքն ֆորմալ իմաստով, կարծես թե համակարգը անկախ էր, բայց առանձին դատավորները միշտ թիրախավորվելու տեղ ունեին։ Շատ քիչ դատավորներ կային, որ որևէ ձևով, որևէ բիզնես կապեր չունեին։ Այսինքն, եթե ընդհանուր համակարգը կոռումպացված է, միշտ կարող ես ինչ-որ մեկին գտնել, որի միջոցով կարող ես դատավորի վրա ազդել։ Հիմա այս վերջին 2․5 տարվա մեջ գոնե այդ իմաստով ահագին բան փոխվել է, այն իմաստով, որ մենք վերևից ներքև այսպես կոռումպացված համակարգ չունենք։ Ու դրա շնորհիվ, այո, այսօր դատարանը ավելի անկախ է քան առաջ։
- Իշխանական խմբակցությունը քննադատում էր Վարդազարյանին իր այդ հայտնի հայտարարության համար: Կուզենայի գնահատեիք նաև ԱԺ «Իմ քայլը» խմբակցության պատգամավորների վարքագիծը:
— Ինձ թվում է՝ պատգամավորները մի փոքր ավելի զուսպ պետք է լինեին իրենց գնահատականների մեջ, որովհետև գործ ունեն իշխանության առանձին ճյուղի հետ։ Հիմա իշխանությունը պատկանում է ժողովրդին ու դա իրականացվում է ընտրված մարմինների միջոցով, այո, այդ իմաստով ճիշտ է ԱԺ-ն ոնց-որ ավելի առաջնային մանդատ ունի, բայց դա բացարձակ չի նշանակում, որ դատական համակարգը ինքնուրույն ճյուղ չի։ Նա, որը որ ունի իր պատասխանատվությունը, իր գործառույթները, իր շրջանակը իշխանության և դրա համար, ես կարծում եմ այդ հարգանքը շատ կարևոր է, որ պետք է պատգամավորներն էլ դրսևորեն։
- ԱԺ քննարկման ժամանակ Արման Բաբաջանյանը նաև ձայնագրություն հրապարակեց, որտեղ սպառնացել են սպանել վարչապետին։ Այդ հայտարարությունը ի՞նչ հետևանքներ կարող է թողնել։
— Դա դատախազության խնդիրն է արդեն, մեծ հաշվով դատավորներն էլ այդտեղ անելիք չունեն։ Դատախազությունը, եթե տեսնում է, որ այդտեղ խնդիրներ կան ապա պետք է համապատասխան քրեական գործեր հարուցվեն ու ընթացք տրվեն։ Ցավոք սրտի, բտռնության խոսքը Հայաստանում շատ տարածված է ու այդ սպանել, սատկացնել, վերացնել տերմինները շատ հաճախ է հնչում և քնչական մարմինները պետք է որոշեն, թե այդտեղ իրական սպառնալիք կա, թե պարզապես վերանբարձ խոսքեր են։ Միշտ չի, որ ասում են կսպանեմ, կսատկացնեմ կամ կվերացնեմ արտահայտություններից հետո բուն գործոունեություն լինում է։ Դա քննչական մարմինների, դատարանի և դատախազության գործն է։ Այդ տրամաբանությամբ այսօր ֆեյսբուք սոցիալական ցանցում սպառնալիքների թվով եթե ոչ տասնյակ հազարավոր, ապա պետք է հազարավոր քրեական գործեր հարուցվեն։ Հիմա ես չեմ կարող ասել, թե այդ հայտարարության մեջ իրական վտանգ կա թե, ցավոք սրտի, մեր սովորական դարձած լեզվական բառապաշարն է՝ ասֆալտներին փռեմ, սատկացնեմ։ Ժամանակին, երբ վարչապետը ասեց պետք է փռենք ասֆալտներին, ոստիկանությունը ինչ-որ պահ դա հրաման ընկալեց և մի քանի օր հենց ասֆալտին էին պառկացնում։
Սոնա Գիշյան
