«Նիկոլը չունի հանրային աջակցություն». մեկնարկել է ՀՀ վարչապետի հրաժարականի պահանջով երթը
ՔԱՂԱՔԱԿԱՆՈՒԹՅՈՒՆ
Ոստիկանությունը ուղեկցում է երթը։ Կոմիտասի պողոտայով մարդիկ շարժվում են դեպի Երևանի Փոքր կենտրոն։
Հայրենիքի փրկության շարժումն այսօր՝ դեկտեմբերի 14-ին, Արաբկիր վարչական շրջանի Վահագն Դավթյան այգու տարածքից մեկնարկեց «Արժանապատվության երթը»։ Մասնակիցների պահանջը մեկն է՝ ՀՀ վարչապետ Նիկոլ Փաշինյանի հրաժարականը։
«Նիկոլը չունի հանրային աջակցություն։ Եթե Նիկոլ Փաշինյանը չի ուզում հեռանալ վարչապետի պաշտոնից, ապա մենք մեր գործողություններով պետք է նրան հեռացնենք այդ պաշտոնից։ Պետք է ամբողջությամբ խաթարվի պետական ապարատի գործունեությունը»,–ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը։
Նա ՀՀ վարչապետին անվանեց ֆեյքերի պարագլուխ և լրագրողների հետ զրույցում նշեց, որ չի ցանկանում անդրադառնալ վարչապետի խոսքերին։
«Էս երկրում թիվ մեկ ապատեղեկատվություն տարածողը Նիկոլ Փաշինյանն է։ Նա ստերի թագավորն է. այդ մարդն ամեն առավոտ սուտ է խոսել, պատերազմի 44 օրերի ընթացքում սուտ է խոսել, հիմա էլ շարունակում է ստել»,–ասաց Սաղաթելյանը։
Հիշեցնենք՝ նոյեմբերի 9–ին ստորագրված եռակողմ հայտարարությունից հետո ընդդիմությունը պարբերաբար բողոքի ակցիաներ է կազմակերպում Երևանում` պահանջելով Նիկոլ Փաշինյանի հրաժարականը։
Դեկտեմբերի 3-ին հայտնի դարձավ, որ ընդդիմությունն առաջարկում է ժամանակավոր կառավարություն ստեղծել, որը կգլխավորի ՀՀ նախկին վարչապետ, Հանրային խորհրդի նախկին նախագահ Վազգեն Մանուկյանը։
