Պետական դավաճանությունը ծանր հանցագործություն է, որին պետք է ընթացք տալ
ՔԱՂԱՔԱԿԱՆՈՒԹՅՈՒՆ
Փաստաբան Նորայր Նորիկյանի համոզմամբ` բանակի մասին դատողությունները սոցիալական հարթակներից ու դրսից պետք է տեղափոխել ինստիտուցիոնալ դաշտ և դրանցով պետք է ոչ թե սովորական մարդիկ զբաղվեն, այլ՝ դատախազությունը:
«Երկրում արտառոց իրավիճակ է առաջացել, որը ոչ միայն մտահոգիչ է, այլև խոսում է հրատապ քայլեր ձեռնարկելու մասին: Բարձրաստիճան անձինք սկսել են խոսել բանակում տեղի ունեցած դավաճանությունների մասին, որն իմ կարծիքով անընդունելի է: Նման հրապարակային խոսակցությունների ժամանակը սպառվել է։ Այս ամենով պետք է զբաղվի դատախազությունը։ Իրավապահ մարմինները պետք է հանրությանը ներկայացնեն բոլոր անձանց արարքների մասին և այդ ամենին պետք է տրվի իրավական գնահատական։ Ես խորապես համոզված եմ, որ պատերազմի պատճառները, արդյունքները, հետևանքները ուսումնասիրելու համար անհրաժեշտ է ձևավորել քննիչ հանձնաժողով, իսկ իրավապահներն իրենց աշխատանքը պետք է հնարավորինս արագ իրականացնեն։ Ակնհայտ է, որ տեղի են ունեցել բացահայտ բացթողումներ, քրեորեն պատժելի արարքներ, որոնց վրա, եթե աչք փակեն, ապա դա ևս դավաճանություն կլինի»,- 1or.am-ի հետ զրույցում ասաց փաստաբանը:
Նրա կարծիքով՝ տարօրինակ է, որ մինչ օրս այս մասով որևէ քրեական գործ չի հարուցվել, առավել ևս, որ հանրությունը կոնկրետ պատասխաններ է սպասում ուժային կառույցներից: Մինչդեռ, դա պետք էր անել օր առաջ, քանի որ հանրությունը պետք է իմանա, թե ովքեր էին այդ դավաճանները, որոնք պատերազմի ժամանակ նման քայլեր են իրականացրել: Պետական դավաճանությունը ծանր հանցագործություն է, որին պետք է ընթացք տալ: Հակառակ դեպքում այն կարող է ավելի վատ հետևանքների հանգեցնել:
Արմինե Գրիգորյան
