Մենք կրկեսի վերածելու հայրենիք ունեինք

Հայաստանի իշխանություններն այնքան էլ ապիկար և տգետ չեն, որքան կարելի է պատկերացնել առաջին հայացքից։ Նրանք հրաշալի սերտել են ժողովրդի ուշադրությունը շեղելու, Հայաստանի դեմ դավադիր իրենց քայլերն էլ ծաղրի առարկա դարձնելու և անլրջացնելու գործը։ Մոտենում է նոյեմբերի 9-ը, և որքան էլ իշխանությունները պնդեն, թե որևէ փաստաթուղթ չի ստորագրվելու Ադրբեջանի հետ, ռուսական և ադրբեջանական աղբյուրները հակառակն են պնդում։ Նիկոլ Փաշինյանի իշխանությունները պարզ և հստակ այդ տեղեկությունները հերքելու փոխարեն ավելի զազրելի միջոց են գտել՝ ծաղրածուների միջոցով են փորձում ազդել հանրության նուրբ լարերի վրա։

«Ազգի ձայն» կուսակցության ղեկավար Մհեր Մեսրոպյանը, ով ավելի հայտնի է որպես երգիչ «Մգեռ Արմենիա», օրեր առաջ հեռուստաեթերից իր վերագտած սերն էր պատմում առ Նիկոլ Փաշինյան, քննադատում ընդդիմությանը, իսկ երեկվանից առաջին հայացքից ծիծաղելի, իսկ իրականում չափազանց վտանգավոր մի արկածախնդրություն է սկսել, որով առնվազն մի քանի օր Փաշինյանը կկարողանա շեղել և մոլորեցնել հանրությանը։ Մգեռը հայտարարել է համազգային շարժման մեկնարկի մասին, նշել, թե իր երկու գաղափարակիցների հետ Սյունիքի մարզի Շուռնուխ գյուղից ոտքով շարժվելու են դեպի Երևան՝ Հանրապետության հրապարակ:

«Մեր ճանապարհը տևելու է 15 օր, նոյեմբերի 7-ին լինելու ենք հրապարակում: Վստահ ենք և հույս ունենք՝ մեզ կմիանան մեր հայրենակիցները, ովքեր մտահոգված են երկրի ճակատագրով: Շարժման պահանջներն են՝ թույլ չենք տալիս, դեմ ենք, որ Փաշինյանը նոյեմբերի 9-ին ստորագրի այն փաստաթղթերը, որոնք մեր երկրի ճակատագրի համար կունենան ցավոտ հետևանքներ։ Պահանջում ենք, որ Փաշինյանը և գործադիրը հրաժարական տան, բայց ցանկանում ենք, որ օրենսդիրը շարունակի աշխատանքը»,- ասել է Մհեր Մեսրոպյանը:

Մեսրոպյանը միգուցե կհասնի Հանրապետության հրապարակ, իր շուրջը կհավաքի մի քանի տասնյակ կամ անգամ հարյուր մարդ, դրանով ցույց կտա, թե չափազանց քիչ թվով մարդկանց է հետաքրքրում Ադրբեջանի հետ ստորագրվելիք համաձայնագրերը, իսկ հանրությունը չի ցանկանում ոտքի կանգնել երկիրը անդունդից դուրս բերելու համար։ Նիկոլ Փաշինյանն էլ տարատեսակ մհերներով կանլրջացնի քաղաքական ծանրագույն պրոցեսները, առանց դիմադրության կստորագրի համաձայնագրերը, կշարունակի առանց խոչընդոտների իշխել Հայաստանում։ Իսկ հանրությունը օրը մեջ նոր ծաղրածուի կգտնի՝ իր տրամադրությունը բարձր պահելու համար։

Զավեն Վարդանյան