Լայնածավալ պատերազմ է ընթանում
ՔԱՂԱՔԱԿԱՆՈՒԹՅՈՒՆ
1or.am կայքի զրուցակիցը ռազմական փորձագետ Կարեն Վրթանեսյանն է։
— Պարոն Վրթանեսյան, այսօր և այս պահին ի՞նչ իրավիճակ է Արցախի սահմանի ողջ երկայնքով։
— Իմ ինֆորմացիան այն է ինչ որ հրապարակվել է պաշտոնապես, այսինքն այն, որ այս պահին դիրքային մարտեր կան հարավում և եթե որևէ բան չի փոխվել նաև հյուսիս-արևելքում։ Բայց այս պահին միայն պետք է հետևել պաշտոնական լրահոսին։
— Նախորդ երկու օրերի համեմատությամբ այսօր իրավիճակը ավելի սրվե՞լ է, թե՞ նույնն է։
— Այդ հարցին պատասխանել չեմ կարող, քանի որ զինվորականները պետք է ասեն թե այս իրավիճակի որքան մասն են հանրայնացնում, իսկ որքանը հասկանալի պատճառներով չեն հրապարակում, բայց կարող եմ ասել, որ արդեն երրորդ օրն է, որ լայնածավալ պատերազմ է, առանց որևէ վերապահումների պատերազմ է ընթանում։
— Հայաստանից ու աշխարհի տարբեր երկրներից կամավորներ են գալիս Արցախ: Այս պահին անհրաժեշտություն կա՞ նրանց այդտեղ լինելու:
— Այս պահին ով ցանկանում է կամավոր գնալ, եթե ԵԿՄ անդամ չի կամ վետերանական այլ խմբի անդամագրված չէ, ապա պետք է դիմեն իրենց զինվորական հավաքակայան, որովհետև առանձին մարդկանց գնալը ավելի շատ խնդիրներ է ստեղծում կազմակերպչական, քանի որ այդ մարդկանց պետք է պահել, սնունդ տալ, ինչպես նաև անհասկանալի է առանձին մարդկանց պատրաստվածությունը և այլն։ Եվ այդ ամենը ստեղծում է խնդիրներ։
— Այսօր նաև սկսել են ակտիվ կրակոցներ ՀՀ տարածքում՝ Վարդենիսում։ Սա անձամբ սպառնալիք չէ Հայաստանի Հանրապետությանը։
— Դե Ադրբեջանը առաջին անգամ չէ, որ սպառնալիքներ է ստեղծում և առաջին անգամ չէ, որ Ադրբեջանը հրետակոծում է Հայաստանի տարածքը և բազմիցս անգամ են քաղաքացիական անձիք սպանվել: Օրինակ 2015 թվականին մի քանի քաղաքացիական զոհվեցին Ադրբեջանի հրետակոծությունների պատճառով։ Այս դեպքում Ադրբեջանը ավելի բաց է գործում, ըստ էության Ադրբեջանը ագրեսոր է և ագրեսիայի թիրախում Հայաստանի Հանրապետությունն է։ Եվ մեր վերաբերմունքը Ադրբեջանին պետք է լինի միայն որպես ագրեսորի։
Սոնա Գիշյան
