«Հայկոյի տունը». Նոյեմբերյանում 44-օրյա պատերազմի հերոս Հայկ Ղարսյանի հիշատակին նվիրված հուշաղբյուր բացվեց
ՀԱՍԱՐԱԿՈՒԹՅՈՒՆ![«Հայկոյի տունը». Նոյեմբերյանում 44-օրյա պատերազմի հերոս Հայկ Ղարսյանի հիշատակին նվիրված հուշաղբյուր բացվեց](/timthumb.php?src=disc/11-08-22/d10a442c553ea3ba4734f67cd91db27d.jpg&w=780)
«Հայկոյիս համար տուն պետք է սարքեի, հուշաղբյուր եմ սարքել»...
Թաց աչքերով ասում է 44-օյա պատերազմում զոհված հերոս Հայկ Ղարսյանի հայրը՝ Լևոնը: Շուրջ մեկուկես տարի տևած շինարարական աշխատանքների ավարտն այսօր նշանավորվեց գեղեցիկ միջոցառմամբ, որին ներկա էին Հայկի հարազատները, ընկերները, ծառայակիցները:
Տավուշի թեմի առաջնորդ Տ. Բագրատ եպիսկոպոս Գալստանյանի կողմից օծվեց հուշաղբյուրում տեղադրված խաչքարը՝ նվիրված Հայկ Ղարսյանին և 44-օրյա պատերազմի հերոսներին: Այնուհետև իրենց կատարումներով հանդես եկան Նոյեմբերյանի Մշակույթի կենտրոնի սաները: Ավագ ընկերոջն իր երգը նվիրեց նաև ժամկետային զինծառայող Արտյոմ Մամյանը, ով հատուկ միջոցառմանը մասնակցելու համար արձակուրդ էր եկել։
Ավագ լեյտենենտ Հայկ Ղարսյանին հետմահու շնորհվեց Կապիտանի կոչում: Իսկ «Գթության Մայր Միջազգային Միություն» ՀՀԿ-ի կողմից նոյեմբերյանցի երեք հերոսները՝ Հայկ Ղարսյանը, Արթուր Ամիրաղյանը և Գեղամ Մաճկալյանն արժանացան մեդալների և պատվոգրերի:
Հայկ Լևոնի Ղարսյանը ծնվել է 1995 թվականի դեկտեմբերի 26-ին՝ Տավուշի մարզի Նոյեմբերյան քաղաքում: 2002թ. ընդունվել է Նոյեմբերյանի թիվ 1 միջնակարգ դպրոց (այժմ՝ ավագ): 2009 թվականին՝ 9-րդ դասարանն ավարտելուց հետո, ուսումը շարունակել է Մոնթե Մելքոնյանի անվան ռազմամարզական վարժարանում: Այդ պատճառով էր, որ դասընկերներն ու հարազատները նրան սկսեցին Մոնթե կոչել: 2013-2017 թթ. սովորել է Վազգեն Սարգսյանի անվան ռազմական համալսարանում։ 2017 թվականին ստացել է Լեյտենանտի կոչում: 2016 թվականի մարտի 30-ին գործուղվել է Արցախ ուսումնական պրակտիկայի, որի ընթացքում էլ մասնակցել է Քառօրյա պատերազմին։
Ավարտելուց հետո ծառայությունը շարունակել է Ասկերանի շրջանի Իվանյան գյուղում, ծառայակից երկու ընկերների հետ բնակվում էր Ստեփանակերտում։ Հայկ Ղարսյանը պատերազմի օրերին եղել է ամենածանր ճակատներում, 30 օր կռիվ է տվել թշնամու դեմ։ Մասնակցել է Ջրականի համար մղվող թեժ մարտերին։ Զոհվել է հոկտեմբերի 25-ին՝ Վարանդայում (Ֆիզուլի), «Բայրաքթար» անօդաչու թռչող սարքի հարվածից։ Ծառայակից ընկերներից մեկը պատմել է, թե ինչպես է Հայկն օգնել իր զինվորներին, վիրավորներին տեղափոխել թաքստոց, սակայն իրենք չեն կարողացել թաքնվել ԱԹՍ-ից։ Հայկը զոհվել է 11 զինակից ընկերների հետ:
Մարիամ Նալբանդյան
![](disc/11-08-22/2a6eeb01477585c6d2b100733a5005f0.jpg)
![](disc/11-08-22/2f2ce700699716a94c0d827e0a5ca404.jpg)
![](disc/11-08-22/d04dd164b0747826ac9acb82131193ad.jpg)
![](disc/11-08-22/2ac62620613bdf2cce55c6f26abdfe7c.jpg)
![](disc/11-08-22/097f1bcabaa5458e0a613f680e63b2f7.jpg)
![](disc/11-08-22/af1734e675a3181893203624cb3d2976.jpg)
![](disc/11-08-22/91fb78ef3a29b2890bf3171e2f862d70.jpg)
![](disc/11-08-22/56c30decf02b7b2caddd531b2bed26b9.jpg)
![](disc/11-08-22/9512f02500800c6019510f0edc8cca67.jpg)
![](disc/11-08-22/329e46bb738ada1f14198293f4186a40.jpg)
![](disc/11-08-22/4fece60153ebfc8f1070e11d2af09131.jpg)
![](disc/11-08-22/8cb1f9d2e56fce1ce0940d87bd73b195.jpg)
![](disc/11-08-22/6d036da0121f01429f25fbfe9d0c48bf.jpg)
![](disc/11-08-22/3c786f7df7cc9a87674f3263d8edf4ca.jpg)
![](disc/11-08-22/fe71908c4500646e284e9ca74fc9c124.jpg)
![](disc/11-08-22/57237e40f10dad1077321a3182558654.jpg)
![](disc/11-08-22/5943ef50555dc08f77c1a2e6196c39a3.jpg)
![](disc/11-08-22/eee6f1ca1e2eedf5424ea8f26d7578ce.jpg)