Ադրբեջանը խոշոր եկամուտներ է ստանում՝ փաշինյանական իշխանության պատճառով

Արցախյան 44-օրյա պատերազմից հետո թե՛ Հայաստանում, թե՛ համաշխարհային ճանաչում ունեցող վերլուծաբանները և քաղաքագետները բազմիցս են նշել, որ պարտության խորհրդանիշ իշխանությունները՝ Նիկոլ Փաշինյանի գլխավորությամբ, չեն կարողանալու արդյունավետ առաջ մղել Հայաստանի շահերը տարբեր բանակցային հարթակներում, իսկ նրանց անողնաշար պահվածքը նորանոր խնդիրներ է հարուցելու Հայաստանի և Արցախի Հանրապետությունների համար։

Հաղթանակից արբած Ադրբեջանը հստակ ռազմավարություն ունի՝ ավելի ու ավելի շատ զիջումներ կորզելու Հայաստանից։ Միջազգային հանրությունն առանձնապես տրամադրված չէ ռուսական ծայրագավառի վերածված Հայաստանին աջակցելու, իսկ ադրբեջանական նավթադոլարներն ու սև խավիարը անում են իրենց սև գործը։ Ընդ որում, Ադրբեջանը ունի թե՛ «պլան մաքսիմում»՝ կտրել Սյունիքն ու ստանալ իրենց բաղձալի միջանցքը, թե՛ «պլան մինիմում»՝ առնվազն լուրջ զիջումներ կորզել Հայաստանից։ Գորիս-Կապան ավտոճանապարհի՝ Ադրբեջանի կողմից վերահսկվող հատվածում մաքսատուրքերի գանձման արդյունքում այդ երկրի պետբյուջե է փոխանցվել շուրջ 2 միլիոն մանաթ կամ մոտ 1,18 միլիոն դոլար։ Այս մասին հայտնել է Ադրբեջանի մաքսային պետական կոմիտեի նախագահ Սաֆար Մեհթիևը։

«Մաքսային պետական կոմիտեի համապատասխան անցակետը ստեղծվել է մոտ երկու ամիս առաջ։ Օտարերկրյա ավտոմոբիլները և քաղաքացիները գրանցում են անցնում և, մաքսատուրքեր վճարելով Ադրբեջան, մուտք գործում ճիշտ նույն ձևով, ինչպես Ադրբեջանի Հանրապետության պետական սահմանը հատելիս մյուս հսկիչ-սահմանային անցակետերում», - ասել է Մեհթիևը։

Այն կապակցությամբ, թե կձեռնարկի արդյոք հակառակ՝ հայկական կողմը նույնպիսի քայլեր, ադրբեջանցի պաշտոնյան դժվարացել է որևէ բան ասել։

«Իրենք են որոշելու՝ ինչ են անելու, երբ մեր մեքենաները մուտք գործեն հակառակ կողմ», - նշել է Սաֆար Մեհթիևը։

Մինչ փաշինյանական իշխանությունները պնդում են, թե նոր ճանապարհ են կառուցում, Ադրբեջանի պետբյուջեն հարստանում է ՀՀ ինքնիշխան տարածքի հաշվին։ Իրանական բեռնատարներն էլ նախընտրում են խոշոր մաքսատուրքեր վճարել ադրբեջանցիներին, քան վարել կիսակառույց և վտանգավոր ճանապարհով։ Մեկ բան, սակայն, Ադրբեջանը սխալ է անում՝ մաքսատուրքերից ստացված գումարներից պարգևավճարներ չի հանում փաշինյանական իշխանության համար, որը դարձել է թշնամի պետութան բյուջեի մուտքերի երաշխավորը։ Թեպետ, մեր այս պնդման մեջ այնքան էլ վստահ չենք։ 

Արտաշես Ներսիսյան