«Ժողովրդավարական» ընտրությունները հարամելու փաշինյանական արվեստը

Դեկտեմբերի 5-ին կայացած ՏԻՄ ընտրությունները դեռ չեն ավարտվել․ փաշինյանական իշխանությունը հիմա էլ փորձում է ամեն գնով խլել իշխանությունը տարբեր համայնքներում։ Դեռևս ընտրությունների գիշերը «Քաղաքացիական պայմանագիր» կուսակցության ներկայացուցիչները սկսեցին հայտարարել, թե 36 խոշորացված համայնքներից հաղթել են 25-26-ում։

Ինքը՝ Փաշինյանն էլ ֆեյսբուքյան էջում գրառում արեց, բազմաթիվ խախտումներով և կեղծիքներով ուղեկցված ընտրությունները ներկայացնելով ժողովրդավարության հաղթանակ, համայնքների զգալի մասում իր պարտությունն էլ օբյեկտիվ իրականություն։ Իրականում, Փաշինյանն ամեն բան անում է՝ ընտրությունների արդյունքները, համայնքապետերի պաշտոնները յուրացնելու համար։ Այդ հարցում, գործող իշխանությունները տարբեր մարտավարություն են իրականացնում՝ կախված առանձին համայնքներում ստացած քվեներից, ավագանիների կազմ անցած մարդկանց վրա հնարավոր ճնշումներից։

Վարդենիսում, օրինակ, իշխանությունները մեղադրանք են առաջադրել «Միասնական Վարդենիս» դաշինքի ցուցակը գլխավորող Արամ Հարությունյանի նկատմամբ, ով համարձակվել էր կոալիցիա կազմել մեկ այլ ընդդիմադիր ուժի հետ։ Մեր տեղեկություններով` իշխանությունները քրեական գործեր են հարուցելու այլ համանքներում ևս։ Որոշ համայնքներում, որտեղ իշխանությունը զգալի թիվ է ստացել, սակայն չի կարողանում մեծամասնություն կազմել, ինտենսիվ բանակցություններ են ընթանում ընդդիմադիր ուժերի ընտրացուցակներով ավագանու կազմում ընտրված անձանց հետ։ Վերջիններիս փորձում են ահաբեկելով կամ շահագրգռելով իրենց կողմը քաշել, համայնքապետի ընտրություններին իրենց ցանկալի արդյունքը ստանալու համար։

«Հայաստան» խմբակցության քարտուղար Արծվիկ Մինասյանի գնահատմամբ` իշխանությունը բոլոր լծակներով տոտալ ճնշումներ է գործադրում ընդդիմադիրների նկատմամբ: «Այն բնակավայրերում, որտեղ իշխող ուժը չի կարողացել 50+ ձայն հավաքել, իսկ մյուս ուժերը, որոնք փորձում են ձևավորել ժողովրդավարությանը բնորոշ կոալիցիաներ և փորձում են իբրև այլընտրանք դիտարկվել, նրանց նկատմամբ իշխանական բոլոր լծակներով և իրավապահ մարմինների անմիջական ներգրավմամբ, էլ չասած՝ քրեական անցյալ ունեցող անձանց ներգրավմամբ»,- նշել է նա։

Ահա սա է փաշինյանական իշխանության իրական դեմքը․ ասել մի բան, անել բոլորովին հակառակը։

Ռոբերտ Երիցյան