Դավադրություն ՀՀ-ի դեմ․ իշխանափոխությունից հետո գաղտնի փաստաթուղթ են քննարկել

Վարչապետի պաշտոնը զբաղեցնող Նիկոլ Փաշինյանի և նրա թիմի գաղտնի գործունեության վերաբերյալ նոր մանրամասներ են հայտնի դառնում։ Մեր աղբյուրների պնդմամբ՝ 2018թ․ իշխանափոխությունից հետո կառավարության վերին էշելոններում գաղտնի փաստաթուղթ են քննարկել, որի էությունը կայանում էր այսպես կոչված «չորրորդ հանրապետության» հռչակումը։ Նիկոլ Փաշինյանն ու նրա փոքրաթիվ կուսակիցներ աշխատել են այդ հայեցակարգի վրա, փորձել սկզբունքներ մշակել՝ ինչպես իրականություն դարձնել իրենց մտահղացումը։

«Քաղաքացիական պայմանագրում», ի դեպ, քչերն են տեղյակ եղել այդ փաստաթղթից։ Մի քանիսն էլ նոր են ծանոթացել այս մտահղացմանը և ցնցվել են գործող իշխանությունների ծրագրածից։ Ընդ որում, սկզբի համար փաշինյանականները քննարկել են ՀՀ հիմնը, զինանշանն ու դրոշը նոր տարբերակներով փոխարինելը, որից հետո անցնելու էին արդեն կառավարման համակարգի, բանակի, Արցախի հետ հարաբերությունների հարցերին։ Ուշագրավ է, որ «Չորրորդ հանրապետության» մասին մի քանի անգամ հայտարարել էր ՀՀ նախագահ Արմեն Սարգսյանը։ Փաստացի, նախագահն էլ խառնված է եղել այդ ծրագրին, գործուն մասնակցություն ունեցել։

Մեր աղբյուրի խոսքով՝ մտահղացումը հնարավոր չի եղել իրագործել 44-օրյա պատերազմի պատճառով, և այժմ հայեցակարգի շուրջ քննարկումները դադարեցվել են, մինչև ՔՊ համար առավել հարմարավետ պայմաններ ստեղծվեն։ Առանց այն էլ հանրության նյարդերը պրկված են, փաշինյանական իշխանությունը զբաղված էր արտահերթ խորհրդարանական ընտրություններով և ՏԻՄ ընտրություններով իր պաշտոնավարումը երկարաձգելու հարցերով, և որոշվել է առժամանակ հետաձգել «չորրորդ հանրապետության» հռչակումը։ Փաստացի, այդ հայեցակարգի ներկայացումը նաև անմիջականորեն կապված էր արցախյան խնդրի հետ, Փաշինյանն ու իր թիմը փորձել են ռեստարտ անել՝ «զրոյական կետից» սկսել ոչ միայն բանակցային գործընթացը, այլև հնարավոր ամեն ինչ։ Թե ինչի հանգեցրեց արցախյան խնդրում Փաշինյանի «զրոյական կետը», հայտնի է բոլորին։ Իսկ թե ինչ աղետի կբերի այս քայլը, նույնիսկ կանխատեսելն է սարսափելի։

Սամսոն Խաչիկյան