Փաշինյանը կրիմինալին փորձում է օգտագործել ՏԻՄ ընտրություններում

Դեկտեմբերի 5-ին համամասնական ընտրակարգով ՏԻՄ ընտրություններ են կայանալու մի քանի տասնյակ համայնքներում։ Քարոզրաշավն այսօր օրերին բուռն է ընթանում, փոխադարձ մեղադրանքներով, իշխանական ռեսուրսների չարաշահմամբ, ընդհուպ կրիմինալի վրա ազդելու միջոցներով։ Փաշինյանական իշխանությունը, գիտակցելով, որ բազմաթիվ խոշոր համայնքներում պարտություն է կրելու, անցել է ընդդիմադիրների լիակատար ահաբեկման, պետական միջոցներն էլ անխնա վատնում են՝ իբր կարիքավորներին օգնություն տրամադրելու, իրականում՝ համակարգված ընտրակաշառք բաժանելու համար։

ՔՊ մեր աղբյուրների փոխանցմամբ՝ նույնիսկ այս պայմաններում իշխանությունները վստահ են, որ շատ համայնքներում չեն կարողանալու ապահովել իրենց երանելի արդյունքը։ Առաջնահերթ խնդիրը, իհարկե, ամենախոշոր քաղաքներում իշխանական թեկնածուների հաղթանակն ապահովելն է, թեև հենց մեծ քաղաքներում է, որ Նիկոլ Փաշինյանի գլխավորած ուժը լուրջ խնդիրների է բախվելու։

Նախօրեին ԶԼՄ-ները տեղեկություններ տարածեցին, թե գրեթե մեկ տասնյակ քրեական հեղինակությունների և, այսպես կոչված, «օրենքով գողերի» հրահանգվել է լքել Հայաստանը։

Մասնավորապես, 1or.am-ի աղբյուրների փոխանցմամբ՝ Փաշինյանը մտավախություն ունի, որ քրեական հեղինակությունները տեղերում կաշխատեն ոչ իր թեկնածուների օգտին և որոշել է շառից-փորձանքից հեռու նրանց հեռացնել երկրից։ Իսկ ովքեր էլ համաձայնվել են անցնել գործող իշխանության թրի տակով և աշխատել իշխանական թեկնածուների օգտին, որևէ ճնշման չեն ենթարկվում։ Քրեական ենթամշակույթի դեմ պայքարելու կոչեր անող իշխանությունն ինքն է այսօր նախկիններից առավել օգտվում քրեական ենթամշակույթ կրողների ծառայություններից, շատերին էլ խոստացել են նոր լծակներ և հնարավորություններ տրամադրել, եթե նպաստեն «Քաղաքացիական պայմանագիր» կուսակցության լոկալ հաղթանակներին։

Մեսրոպ Կիրակոսյան