Հայաստանը չի դիմել Ռուսաստանին և ՄԱԿ-ին

Հայաստանի սահմանին տեղի ունեցող ռազմական գործողությունները կրկին բացահայտեցին Հայաստանի գործող իշխանությունների ապիկարությունը արտաքին քաղաքականության մեջ։ Մինչ իշխող «Քաղաքացիական պայմանագրի» ներկայացուցիչները դաշնակցային պարտականությունների կատարում էին պահանջում Ռուսաստանից, քաղաքական դաշտի մի մասն էլ պահանջում էր դիմել ՄԱԿ-ի Անվտանգության խորհրդին, պարզվեց՝ Նիկոլ Փաշինյանի վարչախումբը պաշտոնապես չի դիմել որևէ մեկին։

ՀՀ ԱԳՆ մամուլի քարտուղար Վահան Հունանյանը հաստատել է, որ իշխանությունները չեն դիմել։

«Հայաստանի Հանրապետությունն անմիջական ու բազմամակարդակ կապի մեջ է դաշնակից Ռուսաստանի հետ: Ինչպես գիտեք, տեղի է ունեցել ՀՀ վարչապետի ու ՌԴ նախագահի հեռախոսազրույցը, որի ընթացքում Նիկոլ Փաշինյանը Վլադիմիր Պուտինին է ներկայացրել իրավիճակը: Այս համատեքստում, երկու երկրների ղեկավարները քննարկել են հնարավոր համատեղ քայլերը, որոնց իրականացումն ամրագրված է երկկողմ իրավապայմանագրային հենքով և համահունչ է դաշնակցային հարաբերություններին»,- դիվանագիտական ձևակերպումներով ՀՀ իշխանությունների անողնաշարությունը հաստատել է ԱԳՆ ներկայացուցիչը:

ՄԱԿ-ի Անվտանգության խորհրդին դիմելու վերաբերյալ էլ Հունանյանը նշել է, թե ՀՀ ԱԳՆ-ն արդեն իսկ տեղեկացրել է ՄԱԿ-ի Անվտանգության խորհրդի նախագահին ստեղծված իրավիճակի մասին: Ցանկանում ենք նշել, որ Հայաստանի Հանրապետության տարածքային ամբողջականությունը և ինքնիշխանությունը պաշտպանելու համար դիտարկվում է միջազգային իրավունքի և դիվանագիտական պրակտիկայի բոլոր գործիքների կիրառումը: Դավադիր այս պահվածքը տրամաբանական որևէ բացատրություն չունի, հատկապես, երբ երեկ ամենալայն ռազմական գործողություններն էին սկսվել ՀՀ ինքնիշխան տարածքի դեմ։

Նիկոլ Փաշինյանի վարչախումբը հրաժարվում է միազգային հանրության հետ գործակցելուց, այդկերպ ՀՀ զինվորականներին և քաղաքացիական բնակչությանը պաշտպանելու իր պարտականությունից։ Եվ լիովին տրամաբանական են դառնում տեղեկությունները, թե իշխանությունը պատերազմի հրահրման միջոցով է փորձում իրականացնել ադրբեջանա-թուրքական օրակարգի կարևորագույն կետերից մեկը՝ միջանցքի տրամադրումը։ Որքան էլ Փաշինյանը փորձի համոզել, թե իշխանությունները գործում են ի շահ ՀՀ-ի, ակնհայտ է՝ գործ ունենք դավաճանության, Հայաստանի տարածքի միտումնավոր նվիրման, ՀՀ քաղաքացիների, Սյունիքի մարզի վտանգման հետ։ Եվ միակ մեղավորն ու պատասխանատուն Նիկոլ Փաշինյանն է։

Մանվել Պետրոսյան