Ընդդիմադիր պատգամավորին կրկին կալանավորել են․ Փաշինյանի իշխանությունը չի հանդարտվելու

Հայաստանի քաղաքական դաշտը, հատկապես ընդդիմադիր ուժերը բոլորովին չեն պատկերացնում, թե ի դեմս Նիկոլ Փաշինյանի, ինչ հիշաչար և հետևողական անձի հետ գործ ունեն։ Փաշինյանը բոլոր ապօրինությունները կգործի, միայն թե վնասի իրեն ընդդիմադիր գործիչներին։ Օրեր առաջ բանտից ազատ էր արձակվել Սիսիանի նախկին քաղաքապետ, «Հայաստան» դաշինքից պատգամավոր ընտրված Արթուր Սարգսյանը։ Երեկ կրկին նրան վերադարձրել են ազատազրկման վայր, վերաքննիչ քրեական դատարանն է որոշել բավարարել Արթուր Սարգսյանի նկատմամբ գրավ կիրառելու առաջին ատյանի դատարանի որոշման դեմ դատախազության բողոքը:

Փաշինյանի իշխանությունը հաջողությամբ իրականացնում է դատական համակարգը ոչնչացնելու և կամակատար դարձնելու իր քաղաքականությունը։ Եթե նախկինում շատ դատավորներ հրաժարվում էին կատարել փաշինյանական վարչախմբի քմահաճույքները, ապա այսօր, գագիկջհանգիրյանների միջոցով, Փաշինյանը հեռացնում կամ ինչ-ինչ միջոցներով յուրացնում է դատական համակարգը, իսկ կալանավորումները ավելի հաճախակի են դարձել։ Մինչ ընդդիմությունը հայտարարում է իրավական ճանապարհով կալանավորումների դեմ պայքարելու մտադրության մասին, Նիկոլ Փաշինյանը քմծիծաղ է տալիս քթի տակ և շարունակում իր հանցավոր գործելաոճը։

Արդյունքում, Հայաստանը մի երկիր է, որտեղ կան բազմաթիվ քաղբանտարկյալներ, չի գործում օրենքը, իսկ իրավունքը կիրառվում է ընտրողաբար։ Ընդդիմության այս պահվածքը, բոլոր հարցերը իրավական ճանապարհով լուծելու մարմաջը ի վերջո հանգեցնելու է «Քաղաքացիական պայմանագիր» կուսակցության ամրապնդմանը, Փաշինյանից փոքրիկ բռնապետ կերտելու օպերացիայի հաջողմանը։ Անհրաժեշտ է մի կայծ՝ հանրությանը, ընդդիմադիր քաղաքական ուժերին համախմբելու, դավադիր և ապիկար վարչախմբից իշխանությունից հեռացնելու համար, այլապես նրանք կկործանեն Հայաստանի Հանրապետությունը։

Արթուր Հովսեփյան