Ղարաբաղի հայերը կարող են ճանաչվել որպես Ադրբեջանի քաղաքացիներ
ՀԱՍԱՐԱԿՈՒԹՅՈՒՆ
rossaprimavera.ru-ն գրում է, որ Լեռնային Ղարաբաղում բնակվող հայերը Ադրբեջանի ջանքերով կճանաչվեն որպես Ադրբեջանի քաղաքացիներ, չնայած Հայաստանի հակազդեցությանը։ Այդ մասին հայտարարել է Ադրբեջանում Ֆրանսիայի առաջին դեսպան Ժան Պերենը։ «Երեսուն տարի անց Ադրբեջանը հասել է Ղարաբաղի խնդրի լուծմանը»,- ասել է Պերենը նշելով Ադրբեջանի կողմից Լեռնային Ղարաբաղում իրականացված ռազմական գործողության հաջողությունը։ Դիվանագետն ասել է, որ ԵԱՀԿ Մինսկի խմբի ընդունված մեծ թվով բանաձևեր թույլ չեն տվել նման արդյունքի հասնել։ Նրա խոսքով, Ադրբեջանի ռազմական գործողության հաջող ավարտից հետո «հակամարտությունը լուծված է արդեն մեկ տարի»։ Պերենը նշել է, որ այս փուլում Ադրբեջանի առջև ծառացած կարևոր խնդիրներից մեկը Ղարաբաղում բնակվող հայերի քաղաքացիության հարցն է։ «Այդ հարցերում Ադրբեջանի դիրքորոշումը հստակ է. Ղարաբաղում բնակվող հայերը Ադրբեջանի քաղաքացիներ են»,- ասել է դիվանագետը։ Միաժամանակ նա նշել է, որ հայերը բողոքում են այդ դիրքորոշման դեմ և շարունակում են դիմադրել։ Այդ հարցը քննարկման կդրվի ԵԱՀԿ Մինսկի խմբի կողմից, և հայկական կողմը կփորձի ազդել համանախագահների վրա, ասել է Պերենը։ «Հայերը կշարունակեն ազդել Ֆրանսիայի վրա, բայց ես հավատում եմ, որ Ադրբեջանը հաջողության կհասնի նաև այդ հարցում»,- հավելել է նա։
Հիշեցնենք, որ 2020 թվականի աշնանը ադրբեջանական բանակի լայնածավալ հարձակման արդյունքում Լեռնային Ղարաբաղը կորցրել է իր տարածքի զգալի մասը, այդ թվում՝ Հադրութի շրջանը և ռազմավարական նշանակություն ունեցող Շուշա քաղաքը։ Բացի այդ, Երևանը Բաքվի վերահսկողությանն է հանձնել Քելբաջարի, Լաչինի եւ Աղդամի շրջանները։ Ռազմական գործողությունները դադարեցվել են Ռուսաստանի, Ադրբեջանի և Հայաստանի ղեկավարների եռակողմ հայտարարությունից հետո։ Տարածաշրջան են բերվել ռուս խաղաղապահներ. դրանից հետո տասնյակ հազարավոր հայեր վերադարձել են Ստեփանակերտ և Լեռնային Ղարաբաղի այլ բնակավայրեր, որոնք մնացել են հայկական կողմի վերահսկողության տակ։
Նյութը հրապարակման պատրաստեց Կամո Խաչիկյանը
