Ավինյանին նոր պաշտոն կտան

Հայաստանի նախկին փոխվարչապետ Տիգրան Ավինյանին նոր և բավական փողաբեր պաշտոն են տալու։ Թերևս դա է պատճառը, որ նա քափուքրտնքի մեջ համակարգում է «Քաղաքացիական պայմանագրի» քարոզարշավը ՏԻՄ ընտրություններում։ Թեև, իհարկե, առանձնակի հաջողություններով չի կարող հպարտանալ այդ առումով։ Հայաստանի կառավարությունը երեկ հայտարարել է, թե նախկին փոխվարչապետ, իշխող «Քաղաքացիական պայմանագրի» վարչության անդամ Տիգրան Ավինյանը կարող է նշանակվել Հայաստանի խոշորագույն ընկերություններից մեկի` Զանգեզուրի պղնձամոլիբդենային կոմբինատի տնօրենների խորհրդի անդամ։ Սա օրվա ընթացքում կոմբինատի և Ավինյանի մասին արդեն երկրորդ հայտարարությունն էր կառավարության կողմից։ Մինչ այդ վարչապետի աշխատակազմի ղեկավար Արայիկ Հարությունյանն ասել էր, թե քննարկվում է Ավինյանին՝ կոմբինատի տնօրեն նշանակելու հարցը։ Կարճ ժամանակ անց, սակայն, կառավարության մամուլի ծառայությունը խմբագրել էր նրա խոսքն ու հայտնել, թե խոսքն Ավինյանին խորհրդի անդամ նշանակելու մասին է:

«Որովհետև նա քաղաքական թիմի անդամ է, և պետք է լավագույնս լինեն այնպիսի մարդիկ, որոնք լավագույնս Հայաստանի շահերը կներկայացնեն տվյալ կազմակերպությունում», - լրագրողների հետ զրույցում ասաց Արայիկ Հարությունյանը: ԶՊՄԿ տարօրինակ և կասկածելի գործարքից հետո կասկած չէր մնում, որ Փաշինյանը փորձելու է իր մարդուն նշանակել ԶՊՄԿ տնօրեն՝ կոմբինատի ֆինանսական հոսքերը վերահսկելու, ԶՊՄԿ աշխատակիցների ռեսուրսն էլ Սյունիքում իր քաղաքական կարիքներին ծառայեցնելու համար։ Սակայն նախկին փոխվարչապետի նշանակումն այդ կարևորագույն պաշտոնին, անհեթեթ է անգամ Նիկոլ Փաշինյանի և նրա կողմնակիցների համար։ Իր պաշտոնավարումը խայտառակ կերպով ձախողած, կորոնավիրուսի դեմ պայքարում պարետի պարտականությունները չկատարած և ոչ կոմպետենտ անձին ԱՊՄԿ-ում պաշտոն տալը ոչ միայն չի ուժեղացնի Նիկոլ Փաշինյանի դիրքերը, այլև, ընդհակառակը, ավելի կթուլացնի։ 

Տարոն Առաքելյան