Հայաստանի իշխանությունների անողնաշար պահվածքը նպաստեց Թուրքիայի հզորացմանը

Տարածաշրջանում Թուրքիայի դերը գնալով աճում է, և այս փաստի մեղավորների թվում առաջիններից մեկը Հայաստանի գործող իշխանություններն են՝ Նիկոլ Փաշինյանի գլխավորությամբ։ Հռոմում «Մեծ քսանյակի» գագաթնաժողովի շրջանակներում հանդիպել են ԱՄՆ և Թուրքիայի նախագահներ Ջո Բայդենն ու Ռեջեփ Թայիփ Էրդողանը։ Ի թիվս բազմաթիվ հարցերի, քննարկել են նաև իրավիճակը Հարավային Կովկասում։ Սպիտակ տունը հայտնում է` Բայդեն-Էրդողան հանդիպման օրակարգում են եղել Հարավային Կովկասում դիվանագիտական ջանքերը։ Մինչ Արցախյան պատերազմը գերերությունները աշխատում էին հեռու պահել Թուրքիային՝ կարգավորման գործընթացից, այսօր, սակայն, փաստ է, որ Թուրքիան է դարձել առաջատար երկրներից մեկը, որի հետ են քննարկում Արցախի հարցը։

Նույն գագաթնաժողովի շրջանակներում հանդիպել են նաև Ռուսաստանի արտգործնախարար Սերգեյ Լավրովը և Թուրքիայի արտգործնախարար Մևլութ Չավուշօղլուն։ ՌԴ ԱԳՆ տարածած հաղորդագրության համաձայն՝ նախարարները քննարկել են Հարավային Կովկասում «3+3» ձևաչափով տարածաշրջանային մեխանիզմի գործարկման հեռանկարները։

«Կարծիքներ են փոխանակվել Հարավային Կովկասում տնտեսական և տրանսպորտային կապերի ապաշրջափակման նպատակով «3+3» տարածաշրջանային մեխանիզմի գործարկման հեռանկարների և փոխշահավետ ենթակառուցվածքային նախագծերի առաջմղման վերաբերյալ»,- ասված է հաղորդագրությունում:

«Այ այսպես, մեր բացակա դիվանագիտության և սուբյեկտայնության արդյունքում թուրքական դիվանագիտությունը մտավ Հարավային Կովկաս»,- արձանագրում է միջազգայնագետ Սուրեն Սարգսյանը։

Հայաստանի Հանրապետությունն այլևս չի կարողանում դիմադրել թուրք-ադրբեջանական ճնշումներին, և գերտերությունները մեր հարցերը քննարկում են ոչ թե ՀՀ իշխանությունների, այլ Թուրքիայի հետ։ Տասնամյակներ շարունակ ՀՀ իշխանություններին հաջողվում էր զսպել կարգավորման գործընթացին Թուրքիայի ներգրավման ախորժակը։ Այդ երանելի ժամանակները վաղուց անցյալում են։ 

Նարեկ Պետրոսյան