Փաշինյանը խոստովանեց իր կատարած հանցանքը

Հայաստանի վարչապետ Նիկոլ Փաշինյանն օրերս ստիպված էր խոստովանել, որ դեկտեմբերին Սյունիքի հատվածում զորքերի հետ քաշվելու բանավոր հրամանն ինքն է տվել։ ԱԺ ընդդիմադիր խմբակցությունները տևական ժամանակ փորձում էին պարզել, թե ով և ինչ հանգամանքներում է տվել այդ ապօրինի և դավադիր հրամանը։ Շաբաթներ շարունակ նրանց գրավոր հարցումներին Պաշտպանության նախարարությունը, Ազգային անվտանգության ծառայությունը տարբեր մեկնաբանություններով հրաժարվում էին պատասխանել։ Չորեքշաբթի կառավարություն-խորհրդարան հարցուպատասխանի ժամանակ ևս մի քանի անգամ հնչեց այս հարցը, և միայն ընդդիմադիր պատգամավոր Աննա Գրիգորյանի հարցին ի պատասխան Փաշինյանը հստակեցրեց. «Ես եմ տվել հրաման հետ քաշվելու, Վաղարշակ Հարությունյանն իրականացրել է այդ հրամանը»:

Փաշինյանն այս որոշումը հիմնավորում է այսպես. այդ շրջանները հանձնվել են 7 շրջանների մաս լինելու բերումով, իսկ որ Սյունիքին սահմանակից Զանգելանն ու Կուբաթլուն բանակցությունների առարկա դարձած 7 շրջանների մաս են, ըստ նրա, հիմնավորվում է նաև արդեն հայտնի դարձած «Վարչատարածքային բաժանման մասին» օրենքով, որն ընդունվել է 2010 թվականին նախկին իշխանությունների ժամանակ: Ապա Փաշինյանն ակնարկել էր ինչ-որ փաստաթղթի նախապատրաստման մասին, որն այդպես էլ չի ստորագրվել, այլ մանրամասներ չի փոխանցել։ Ընդդիմադիր «Հայաստան» խմբակցությունը երեկ արձանագրել է, թե գլխավոր դատախազությունը պետք է նյութեր նախապատրաստի վարչապետ Նիկոլ Փաշինյանի այս հայտարարության առնչությամբ։

«Չէր կարող որևիցե մեկը բանավոր հրաման տալ հետ քաշվելու, այն էլ այն վայրերում, որոնք հետագայում պետք է վիճաբանության առարկա դառնային մեր սահմանները ճշտելու ուղղությամբ», - ասել է խմբակցության ղեկավար Սեյրան Օհանյանը:

Վարչապետի այս հայտարարությունը, ըստ էության, ապացուցում է, որ Սյունիքում ստեղծված ծայրաստիճան ծանր իրավիճակի միակ պատասխանատուն ու մեղավորը մեկ մարդ է, և այդ մարդը Նիկոլ Փաշինյանն է։ Այլ հարց, որ նրա խամաճիկը դարձած իրավապահ մարմինները որևէ քայլ չեն ձեռնարկի մեղավորին պատասխանատվության կանչելու ուղղությամբ։

Խաչիկ Ղևոնդյան