Թուրքիայի նախագահն իր կամքը թելադրեց արևմտյան տերություններին

Թուրքիայի նախագահը հետ է կանգնել 10 արևմտյան երկրների դեսպաններին արտաքսելու որոշումից: Այդ մասին Ռեջեփ Էրդողանը հայտարարել է Անկարայում մամուլի ասուլիսի ժամանակ՝ ընդգծելով, որ դեսպանները հրաժարվել են իրենց ավելի վաղ հայտնած դիրքորոշումից և այսուհետ ավելի զգույշ կլինեն իրենց հայտարարություններում։ Հոկտեմբերի 23-ին Թուրքիայի նախագահ Ռեջեփ Էրդողանը հրահանգել էր արտգործնախարարությանը արտաքսել 10 դեսպաններին՝ այն բանից հետո, երբ նրանք կոչ էին արել ազատ արձակել թուրք իրավապաշտպան, հասարակական գործիչ և գործարար Օսման Քավալային, ով մեղադրվում է պետական հեղաշրջման փորձի համար։

Կանադայի, Ֆրանսիայի, Ֆինլանդիայի, Դանիայի, Գերմանիայի, Նիդերլանդների, Նոր Զելանդիայի, Նորվեգիայի, Շվեդիայի և ԱՄՆ դեսպանները Թվիթերում հայտարարություն են տարածել՝ նշելով, որ Դիվանագիտական հարաբերությունների մասին Վիեննայի կոնվենցիային համապատասխան՝ չեն պատրաստվում խառնվել Թուրքիայի ներքին գործերին։ Սա ընդամենը մեկ օրինակ է, թե ինչպես կարելի է պաշտպանել սեփական երկրի ինքնիշխանությունը, նույնիսկ կոշտ մեթոդներով։ Եվ խոշոր երկրները ստիպված եղան հաշվի նստել Թուրքիայի իշխանությունների պահանջների հետ։ Ցավալիորեն, պետականամետության այս դրսևորումը տեսնում ենք Թուրքիայի՝ մեր գլխավոր թշնամի պետության կողմից, որը հզորանալով կարողանում է իր կամքը թելադրել անգամ Ֆրանսիայի, Գերմանիայի, Միացյալ Նահանգների պես երկրներին։ Այն երկրներին, որոնց վրա սխալմամբ հույս էր դրել Հայաստանը, թե պատերազմի ժամանակ կօգնեն և կդադարեցնեն ռազմական գործողություները։ Դժվար թե այս և նմանատիպ այլ դեպքերը դաս լինեն Հայաստանի և հայ հանրության համար, թե ինչպես պետք է պահել սեփական դեմքը։

Հայաստանը Նիկոլ Փաշինյանի ձեռամբ, կորցրել է իր սուբյեկտայնությունը, և արդեն ոչ ոք հաշվի չի նստում մեր հետ։ Մինչդեռ Թուրքիան և նրա կրտսեր եղբայր Ադրբեջանը գնալով ավելի են բարձրացնում իրենց սուբյեկտայնության մակարդակը, տարածաշրջանում լուրջ խաղացողներ դառնում, առաջ մղում իրենց սեփական շահերը։

Գրիգոր Առաքելյան