Ապօրինությունները շարունակվում են․ «Պատրոն Դավոն» կմնա կալանքի տակ

Վերաքննիչ քրեական դատարանը՝ դատավոր Մնացական Հարությունյանի նախագահությամբ, մերժել է Դավիթ Գալստյանին՝ Պատրոն Դավոյին կալանավորելու որոշման դեմ պաշտպանների բողոքը։ Գալստյանը, պաշտպանության նախկին նախարար Դավիթ Տոնոյանը և ԶՈՒ ԳՇ պետի տեղակալ Ստեփան Գալստյանը մեղադրվում են անորակ և ժամկետանց հրթիռներ գնելու, պետությանը 4,7 մլն դոլարի վնաս հասցնելու մեջ։

Հայաստան զենքի մատակարարի դեմ իշխանության այս անիրավություններն արդեն վաղուց դուրս են եկել ողջամտության սահմաններից։ Դավիթ Գալստյանի նկատմամբ նման թշնամաբար էին տրամադրված մեկ Իլհամ Ալիևը, մեկ էլ՝ Նիկոլ Փաշինյանը։ Զենքի մատակարարը, նշենք, սեփական միջոցներով էլ զենք էր մատակարարել Հայաստան պատերազմի օրերին։ Իսկ նրա գործառույթները ընդհանրապես կայանում են Պաշտպանության նախարարության և ԳՇ պատվերով համապատասխան զենք և զինամթերք Հայաստան ներմուծելը։

Բանակում կարգուկանոն հաստատելու, ռազմական ղեկավարության շրջանում կոռուպցիոներների բացահայտման և պատժելու փոխարեն Նիկոլ Փաշինյանը պարբերաբար որոշում է քավության նոխազ ստեղծել իր համար Դավիթ Գալստյանից և ազատազրկել նրան։ Մեղադրանքներն այնքան աբսուրդ են, որ անգամ դատարաններն են ստիպված լինում ի վերջո ազատ արձակել «Պատրոն Դավոյին»։ Դա, իհարկե, իշխանության կամակատարներին չի վերաբերում։ Այդպիսի դատավորները պատրաստ են ցանկացած անմեղ մարդու բանտ ուղարկել, միայն թե կատարեն Նիկոլ Փաշինյանի ապօրինի հրահանգները։ Իսկ այդ ընթացքում տուժում են Հայաստանի զինված ուժերը, խաթարվում է զենքի և զինամթերքի առաքման գործընթացը։ Թեև, Փաշինյանը կարող է որևէ հարմար աներձագի կամ սանիկի միջոցով սկսել զենքի բիզնեսը, այլ՝ անորակ և ժամկետանց զինամթերք նաղդելով ՀՀ բյուջեի վրա։

Կարեն Երանոսյան