Փաշինյանը փորձում է ազատվել Ռուսաստանում Հայաստանի դեսպանից

Նիկոլ Փաշինյանը տևական ժամանակ փորձում է ազատվել Ռուսաստանում Հայաստանի դեսպան Վարդան Տողանյանից, սակայն ապարդյուն։ Դեռևս պատերազմից առաջ Նիկոլ Փաշինյանը ջանքեր էր գործադրում ռուսական իշխանություններին համոզելու, Տողանյանին հետ կանչելու և նրա փոխարեն իր թիմակից կամ հավատարիմ մեկին նշանակելու։ Իսկ պատերազմից հետո, ընդհանրապես, Ռուսաստանի իշխանությունների հետ շփումներում փաշինյանական վարչախումբն անընդհատ բարձրացնում է Տողանյանին հեռացնելու հարցը։ Տողանյանը յուրային չէ «հեղափոխական» թիմում, ավելին՝ անընդհատ շեշտում է, որ որևէ կապ չունի փաշինյանականների հետ, զզվում է «ուսապարկերից»։

Վարդան Տողանյանը լուրջ ազդեցություն ունի ՌԴ ԱԳՆ-ում, որտեղ չեն ցանկանում նրա ազատումը, և փոխարենը, փաշինյանական որևէ կադրի նշանակումը։ Ռուսաստանի ԱԳՆ-ում Տողանյանի համար լուրջ լոբբինգ է իրականացվում, և հաշվի չեն առնում անգամ Փաշինյանի ներկայացրած երկու կադրերին։ Հայաստանի վարչապետի աթոռը զբաղեցնող անձը, ի դեպ, ՌԴ-ում դեսպանի պաշտոնի համար երկու թեկնածու ունի։ Մեկը՝ պաշտպանության նախկին նախարար Վաղարշակ Հարությունյանն է։ Թեև Հարությունյանը համարվում է յուրային ռուսական շրջանակներում, սակայն նրան չեն վստահում՝ հաշվի առնելով գեներալ-լեյտենանտի թույլ հեղինակությունը, անձնական և մասնագիտական որակները, ղեկավարելու հմտությունների պակասը։

Փաշինյանական իշխանությունը դեմ չէ նույնիսկ ԱԳ նախկին նախարար Զոհրաբ Մնացականյանի նշանակմանը։ Պատերազմից հետո Մնացակայանը հրաժարական տվեց, եւ իր ժամանակի մեծ մասն անցկացնում է Մոսկվայում։ Բանակցային գործընթացը ձախողած և պատերազմի հետեւանքների համար պատասխանատու անձանցից մեկի թեկնածությունն էլ են առաջարկել ռուսական կողմին, սակայն Լավրովի աշխատակազմից հստակ հասկացրել են՝ ագրեման չեն տա։ Իսկ դա խայտառակություն կլինի Հայաստանի իշխանությունների համար։

Գարիկ Բադալյան