Թուրքերը ծաղրում են Փաշինյանի դրական ազդակները 

«Թուրքիան դրական է ընդունում Հայաստանի հետ հարաբերությունները կարգավորելու հայտարարությունները, բայց կոնկրետ դեռևս ծրագիր չկա»,- այս մասին հայտարարել է Թուրքիայի արտգործնախարար Մևլութ Չավուշօղլուն Բաքվում ադրբեջանցի իր գործընկեր Ջեյհում Բայրամովի հետ համատեղ ասուլիսում։

Չավուշողլուն< շարունակելով ծաղրել Հայաստանի Հանրապետությանը, հայտարարել է բառացի հետևյալը. «Հայաստանի հետ հարաբերությունների կարգավորման ծրագիր դեռևս չկա, վարչապետ Նիկոլ Փաշինյանը հայտարարություններ արեց. «Մենք դրանք դրական ընդունեցինք, Ադրբեջանը խաղաղության պայմանագրի առաջարկ է արել Հայաստանին, Հայաստանն առայժմ դրական պատասխան չի տվել,- ասել է Չավուշօղլուն և շարունակել, թե ցանկացած քայլ իրենք կքննարկեն Ադրբեջանի հետ և համատեղ քայլեր կձեռնարկեն։ Սա ընդամենը մեկ օրինակ է այն ամենի, թե Հայաստանի Հանրապետության իշխանությունները ինչ օյին են բերում սեփական երկրի գլխին։

Թուրքիան, ինչպես և Ադրբեջանը շարունակում են ծաղրել Հայաստանի Հանրապետությանը, շարունակում են պարտված պետության հետ վարվել այնպես, ինչպես կվարվեր ցանկացած թուրքական հետամնաց, հետադիմական կազմավորում արևելքում։ Սակայն չպետք է որևէ կերպ Հայաստանի Հանրապետության քաղաքացին այս փաստից զարմանա, թե ինչու է այս ամենը կատարվում իր հետ։ Այս ամենը տեղի է ունենում մեկ պատճառով. Հայաստանի իշխանության ղեկին Նիկոլ Փաշինյանի ապիկար թիմն է։ Դրական ազդակներ տալով Թուրքիային՜ հայտարարելով խաղաղության դարաշրջան սկսելու մասին՝ Նիկոլ Փաշինյանը ամեն ինչ անում է Հանրապետության հեղինակությունն ու վարկը գետնին հավասարեցնելու համար։ 

Արդյո՞ք Թուրքիան պատրաստ է խաղաղության դարաշրջանի, չգիտենք, արդյո՞ք Ադրբեջանը պատրաստ է խաղաղության, բացարձակապես՝ ոչ․ և այդ առումով Հայաստանի պաշտոնյաների հայտարարությունները, հատկապես անվտանգության խորհրդի քարտուղար Արմեն Գևորգյանի հայտարարությունը, թե Հայաստանը պատրաստ է խաղաղություն սկսել, բացարձակապես անհեթեթ են, վտանգավոր և հեղինակազրկում են մեր պետությունը։ Որ բնականաբար Հայաստանը պետք է ինքը շփվի հակառակորդի հետ ուղիղ, հստակ ներկայացնի իր ազդակները, իր մտահոգությունները, լսի նաև հակառակորդին, այլ տարբերակ մենք այս պահին ուղղակի չունենք։ Սակայն անընդհատ շեշտել խաղաղություն սկսելու մեր պատրաստակամության մասին, երբ դիմացինը մեզ պարզապես ծաղրում է, առնվազն անլուրջ է, անհեթեթ։ Եվ Մևլութ Չավուշօղլուն որևէ մեղք չունի, նա Հայաստանի հետ վարվում է այնպես, ինչպես կվարվեր յուրաքանչյուր հաղթած կողմ, իսկ որ պատերազմում հաղթել է Թուրքիան, որևէ մեկս կասկած չունենք։

Ներսես Արզումանյան