ԱՄՆ-ի առաջարկները․ ի՞նչ է թաքնված այս ակտիվության տակ

Նյու Յորքում այս օրերին ընթանում է Գլխավոր վեհաժողովի 76-րդ նստաշրջանը, որի կուլիսներում ակտիվորեն քննարկում են Հարավային Կովկասում ստեղծված իրավիճակը։ Մինչ Հայաստանի արտգործնախարարը հաջողացնում է խղճուկ հանդիպումներ ունենալ Լիտվայի, Սլովենիայի, Ավստրիայի և Լեհաստանի իր պաշտոնակիցների հետ, Թուրքիայի և Ադրբեջանի արտգործնախարարներն արդեն լուրջ հանդիպումներ են ունեցել, ներկայացրել իրենց դիրքորոշումները արցախյան հարցում։ Միացյալ Նահանգների պետքարտուղար Էնթոնի Բլինքենը խնդրին անդրադարձել է Թուրքիայի արտգործնախարար Մևլութ Չավուշօղլուի հետ հանդիպման ընթացքում։ Դրանից հետո Պետդեպի կայքում տարօրինակ մի զրույցի սղագրություն հայտնվեց, որտեղ ամերիկյան երկու, անունները չբացահայտված պաշտոնյաներ ուշագրավ ակնարկներ էին անում։

«Պետքարտուղարը հստակ հասկացնել է տվել Թուրքիային, որ Միացյալ Նահանգները պատրաստ է օգտակար լինել», - ասվում է Պետքարտուղարության պաշտոնական կայքէջում տեղադրված հաղորդագրությունում։

Նշվել է նաև, թե ամերիկացի պաշտոնյաներն այս օրերին հայ և ադրբեջանցի գործընկերներին միևնույն առաջարկն են անում, սակայն, թե ինչ առաջարկի մասին է խոսքը, չի հստակեցվում։ Պետքարտուղարության ներկայացուցիչը հիշեցրել է, որ Վաշինգտոնն արդեն մասնակցել է Ադրբեջանի և Հայաստանի միջև ականազերծման մի քանի քարտեզների, ինչպես նաև հայ գերիների փոխանակումներին։

«Այժմ հարց է ծագում՝ արդյոք հնարավո՞ր է Միացյալ Նահանգների, Մինսկի խմբի մյուս երկրների ու Թուրքիայի աջակցությամբ ավելին անել` նպաստելու երկու երկրների միջև լարվածության թուլացմանը ինչպես սահմանին, այնպես էլ ձերբակալվածների, ականների հարցում, ինչը թույլ կտա շարունակել խաղաղության և հաշտեցման ճանապարհը»,- ասել է պետքարտուղարության պաշտոնյան։

Ամերիկյան առաջարկի որևէ մանրամասն դեռ հայտնի չէ, սակայն այս ակտիվությունն ու գաղտնապահությունը կարող են լուրջ մտահոգություններ առաջացնել։ 

Սարգիս Թադևոսյան