Կառավարության հերթական անհեթեթությունը․ կրճատում են Ամանորը

Հայաստանի կառավարությունն այսօր կայանալիք նիստում քննարկելու է «ՀՀ տոների և հիշատակի օրերի մասին» օրենքի փոփոխության հերթական նախագիծը, որի հեղինակը իր անհեթեթություններով բոլորին գերազանցած էկոնոմիկայի նախարար Վահան Քերոբյանն է։ Նախարարությունն առաջարկում է կրճատել ամանորյա հանգստյան օրերի քանակը` ոչ աշխատանքային թողնելով միայն դեկտեմբերի 31-ն ու հունվարի 1-ը։ Հունվարի 2-ը, 3-ը, 4-ը, 5-ը և 7-ը առաջարկվում է դարձնել աշխատանքային օրեր, իսկ հունվարի 6-ը` Սուրբ ծնունդը, թողնել ոչ աշխատանքային։ Էկոնոմիկայի նախարարությունը նույնիսկ հիմնավորում է գրել, իբր նման քայլը թույլ կտա համախառն ներքին արդյունքի ծավալն ավելացնել 88․6 մլրդ դրամով։ Որևէ փաստագրված հիմք այս առաջարկը, բնականաբար չունի, ինչպես և գործող իշխանության բազմաթիվ նախաձեռնությունների դեպքում է։ Բարդ է իհարկե պատկերացնել, որ դեկտեմբերի 31-ին և հունվարի 1-ին արագացված տեմպերով Ամանորը նշող պետական ծառայողը կգա աշխատանքի հունվարի 2-ին և լիարժեք կաշխատի։ Հատկապես խումհարից հետո, հընթացս էլ մտածելով, թե երեկոյան որտեղ է շարունակելու տոնը նշելը։

Մեծ հավանականությամբ, Ամանորին աշխատանքի եկողները լավագույն դեպքում իրար կշնորհավորեն, մի քանի ժամ կմնան կաբինետներում, և արանքը կճղեն՝ որևէ կերպ չնպաստելով ՀՆԱ-ի ավելացմանը։ Այն, որ էկոնոմիկայի նախարարը գերատեսչությունը ղեկավարում է Menu.am-ի տրամաբանությամբ, որևէ ողջամիտ մարդու մոտ կասկած չի հարուցում։ Միգուցե առաքման ծառայությունում արդարացված է աշխատանքը սկսել հենց հունվարի 2-ին, շատերը, տանը ոչինչ չեն պատրաստի, և սնունդ ու խմիչք կպատվիրեն։ Առաքման ծառայությունն էլ հենց դրա համար է, որ իրագործի պատվերը։ Բայց պետական հաստատությունները առաքման ծառայություն չեն, մարդիկ ունեն Ամանորը տոնելու իրավունք, ձևավոված ավանդույթներ։ Որևէ մեկը չի ասում, թե տոները պետք է նշել մի քանի շաբաթ, բայց առնվազն մի քանի օրը չի խանգարի, այլ ընդհակառակը կօգնի հետագայում ավելի արդյունավետ աշխատելու, երկրի ՀՆԱ-ն էլ ավելացնելու հարցում։

Տիգրան Մաթևոսյան