Գյումրիում թեժ ընտրապայքար է սպասվում
ՎԵՐԼՈՒԾՈՒԹՅՈՒՆՆԵՐ
Հոկտեմբերի 17-ին Գյումրիում թեժ ընտրապայքար է սպասվում։ Երկուշաբթի ավարտվում է վերջնաժամկետը, երբ կուսակցություններն ու դաշինքները կարող են ներկայացնել իրենց ընտրական ցուցակները։ Այս պահի դրությամբ, հայտնի են մի քանի մասնակիցների անունները։ Ընտրություններին մասնակցելու հայտ է ներկայացրել իշխող «Քաղաքացիական Պայմանագիրը», քաղաքապետի թեկնածուն Շիրակի գործող մարզպետ Հովհաննես Հարությունյանն է։ Գործող քաղաքապետ Սամվել Բալասանյանն անձամբ չի մասնակցելու, փոխարենը կմասնակցի նորաստեղծ «Բալասանյան դաշինք» սոցիալական կուսակցությունը, որը 42 հոգանոց ցուցակ է ներկայացրել ընտրատարածքային հանձնաժողով։ Կուսակցության հիմնադիրը նրա ավագ որդին է՝ Միսակ Բալասանյանը։
Ո՛չ Գյումրին արդեն ինը տարի ղեկավարող Բալասանյանը, ո՛չ էլ որդին ընտրացուցակում ընդգրկված չեն, իսկ ցուցակը գլխավորում է քաղաքապետարանի աշխատակից Վարդգես Սանոսյանը։ «Գյումրին կռնա» դաշինքի ցուցակը գլխավորելու է գործարար Վարդան Սրտաշյանը, քաղաքապետի թեկնածուն Վարդան Գրիգորյանն է։ Վերջինս մինչ անցած տարի Շիրակի փոխմարզպետն էր։
Հայաստանի հանրապետական կուսակցության ցուցակը գլխավորելու է ՀՀԿ Շիրակի տարածքային կազմակերպության ղեկավար Արտյոմ Ղուկասյանը, ով նախկին քաղաքապետ Վարդան Ղուկասյանի եղբորորդին է: Երեկ էլ հայտնի դարձավ «Հայրաքաղաք» դաշինքի մասին, որում ներկայացված են Ռամկավար Ազատական և «Ժառանգություն» կուսակցությունները։ Ժուռնալիստների «Ասպարեզ» ակումբի նախագահ Լևոն Բարսեղյանը հայտնել է, որ ցուցակն ինքն է գլխավորում։
Ընդդիմադիր «Հայաստան» դաշինքը չի մասնակցի, փոխարենը կարող է մասնակցության հայտ ներկայացնել «Թասիբով դաշինք» անունով միավորումը, որի թեկնածուն կլինի Կարապետ Պողոսյանը։ Վերջինս խորհրդարանական ընտրությունների ժամանակ Ռոբերտ Քոչարյանի գլխավորած դաշինքի պատասխանատուներից էր։
«Լուսավոր Հայաստանը» ևս կարող է մասնակցել, այդ դեպքում ցուցակը կգլխավորի նախկին պատգամավոր Սարիկ Մինասյանը։ Բոլոր այս անունները վկայում են, որ Գյումրիում չափազաց թեժ պայքար է սպասվում, և իշխանության համար բարդ է լինելու երկրորդ քաղաքն իր վերահսկողության տակ վերցնելը։
Միքայել Հակոբյան
