Հոկտեմբերի 1-ից աշխատակցի չպատվաստվելու կամ ՊՇՌ թեստ չհանձնելու դեպքում կտուժի գործատուն. ստուգայցեր են կատարելու
ՀԱՍԱՐԱԿՈՒԹՅՈՒՆ
Առողջապահության նախարարի հրամանով՝ հոկտեմբերի 1-ից պետական և մասնավոր բոլոր հիմնարկների աշխատակիցները կա՛մ պետք է պատվաստվեն կորոնավիրուսի դեմ, կա՛մ 14 օրը մեկ ներկայացնեն 72 ժամ վաղեմության ՊՇՌ թեստի բացասական պատասխանը հավաստող սերտիֆիկատ:
Պատվաստումն անվճար է, իսկ ՊՇՌ թեստի համար, որն արժե 15.000 դրամ, աշխատողը պետք է վճարի սեփական միջոցներով:
Բոլոր տնտեսվարողները պետք է վարեն գրանցամատյաններ, որում կնշվի աշխատակիցների պաստվաստված լինել-չլինելու, ՊՇՌ թեստ ներկայացրած լինել-չլինելու, կամ պատվաստվելու հակացուցումների մասին տեղեկություններ:
168.am-ը Առողջապահության նախարարության Հասարակայնության հետ կապերի բաժնի պետ Լիլիթ Բաբախանյանից հետաքրքրվեց, թե ինչպե՞ս է իրականացվելու վերահսկողությունը:
«Մենք քաղաքականությունն ենք մշակում, իսկ վերահսկողությունն իրականացնում է Առողջապահական և աշխատանքի տեսչական մարմինը, կամ Ոստիկանությունը»:
Դիմեցինք Առողջապահական և աշխատանքի տեսչական մարմին, խնդրեցին գրավոր հարցում ուղարկել: 168.am-ի գրավոր հարցմանը, թե ինչպե՞ս է տեսչական մարմինը վերահսկելու այս գործընթացը՝ հատկապես մասնավոր ընկերությունների պարագայում, պատասխանել են.
«Տեսչական մարմինը վերահսկողությունն իրականացնում է ստուգայցերի միջոցով՝ անկախ կազմակերպաիրավական ձևից և գերատեսչական պատկանելությունից, որի ընթացքում ուսումնասիրելու է նաև գրանցամատյանների առկայությունը, կատարված գրանցումները և աշխատողի կողմից ներկայացված կորոնավիրուսային հիվանդության (COVID-19) դեմ ամբողջական պատվաստված լինելը հավաստող կամ յուրաքանչյուր 14 օրը մեկ ՊՇՌ հետազոտության բացասական արդյունքը հավաստող կամ հակացուցումը հավաստող տեղեկանքների համապատասխանությունը»։
Հրամանով մատնանշված են դեպքեր, երբ աշխատակցին որոշակի ժամանակով կարող է հակացուցված լինել պատվաստվելը: Որքա՞ն ժամանակը մեկ է իրականացվելու ստուգման գործընթացը: Մեր այս հարցին, ըստ էության, տեսչական մարմնից չեն պատասխանել:
«Կազմակերպության կորոնավիրուսային հիվանդության տարածման կանխարգելման պատասխանատուն իրականացնում է շարունակական դիտարկում բժշկական ժամանակավոր հակացուցումների մասին բժշկական փաստաթուղթը ներկայացնելու օրվանից յուրաքանչյուր 14 օրը մեկ, ինչպես նաև առաջին դեղաչափի պատվաստման սերտիֆիկատը ներկայացնելու օրվանից հետո մինչև երկրորդ դեղաչափի ժամկետը լրանալը՝ կատարելով համապատասխան գրառում գրանցամատյանում»:
Ո՞ր մարմինը և ի՞նչ պատժամիջոցներ է կիրառելու հրամանով սահմանված պայմանները չպահպանելու դեպքում: Ինչպիսի՞ պատասխանատվության են ենթարկվելու աշխատակիցը և գործատուն:
«Առողջապահական և աշխատանքի տեսչական մարմինն իր իրավասության սահմաններում ստուգայցեր իրականացնելիս պատասխանատվության միջոցներ կիրառում է գործատուի նկատմամբ՝ «Վարչական իրավախախտումների վերաբերյալ» ՀՀ օրենսգրքի 182.4 հոդվածով սահմանված կարգով»:
Նշված հոդվածի 3-րդ կետով սահմանվում է, որ «կարանտինի ընթացքում տնտեսական գործունեության առանձին տեսակների իրականացման և ծառայությունների մատուցման, ինչպես նաև տնտեսական գործունեությամբ չզբաղվող այլ կազմակերպությունների գործունեության սահմանափակումները խախտելը` առաջացնում է նախազգուշացում կամ տուգանքի նշանակում` սահմանված նվազագույն աշխատավարձի հարյուրապատիկից մինչև երեքհարյուրապատիկի չափով»: Նույն հոդվածի 4-րդ կետով էլ ասվում է, որ «182.4 հոդվածի 3-րդ մասով նախատեսված արարքը վարչական տույժ նշանակելու օրվանից հետո` մեկ տարվա ընթացքում, կրկին կատարելը` առաջացնում է տուգանքի նշանակում՝ սահմանված նվազագույն աշխատավարձի հարյուրհիսնապատիկից մինչև հինգհարյուրապատիկի չափով»:
