Վտանգավոր թեզեր փաշինյանական իշխանության կողմից

Հայաստանի վարչապետ Նիկոլ Փաշինյանի կողմնակիցները նոր հրահանգ են ստացել, հանրության շրջանում՝ առաջ տանել պատերազմում Փաշինյանի իշխանության պատասխանատվությունը զրոյացնելու թեզերը։ Իշխանությունը, օգտագործելով իր մարդկային և տեղեկատվական ռեսուրսները, մարդկանց մեջ փորձում է ներարկել, թե խորհրդարանական արտահերթ ընտրություններում Նիկոլ Փաշինյանի ստացած քվեն զրոյացրել է իշխանության պատասխանատվությունը պատերազմի ու դրա հետևանքների հարցում։ Փաշինյանի քարոզչամեքենան միշտ էլ փորձել է պատերազմի պատասխանատվությունը բարդել այլոց վրա։

«Ես ասում եմ՝ ես ինձ համարում եմ թիվ մեկ պատասխանատուն, բայց չեմ համարում թիվ մեկ մեղավորը: Դա չի նշանակում, որ ես ասում եմ՝ ես մեղավոր չեմ: Ես ասում եմ, որ թիվ մեկ պատասխանատվությունը և թիվ մեկ մեղավորությունը եկեք իրար հետ չխառնենք, որովհետև ես շատ պարզ հարց եմ տալիս, մեզ ասում են բա ինչի՞ էս 2,5 տարվա ընթացքում էս հարցը չի լուծվել և թվարկում են 30 տարվա օրակարգ: Այո՛, իմ մեղավորությունը դա է, որ 2,5 տարվա ընթացքում չեն լուծվել բազմաթիվ հարցեր, որոնք կարող էին ավելի լավ լուծվել, և ես ստանձնում եմ այդ պատասխանատվությունը, բայց դա չի նշանակում, որ 30 տարվա, 25 տարվա չարածի մեղավորությունը պետք է բոլորը հրեն դեպի գործող կառավարություն»,- դեռևս դեկտեմբերին ասել է Նիկոլ Փաշինյանը։

Այսօր արդեն իշխանությունը նոր առիթ է գտել՝ պատասխանատվություն չկրելու համար։ Անվտանգության խորհրդի քարտուղար Արմեն Գրիգորյանն էլ «Ազատություն» ռադիոկայանի եթերում անուղղակիորեն առաջ է մղում ընտրությունների արդյունքներով իրենց թիմի պատասխանատվության զրոյացման թեզը։ Բնականաբար, այս իշխանությունը չի խոստովանի, որ ժողովուրդը ոչ թե իրենց է քվե տվել, այլ, հակաքարոզչության, նախկինների դեմ տասնամյակներով գեներացված ատելության, նախկին ու թշնամուն հաղթած նախագահներին «բոբո» ներկայացնելու շնորհիվ իրենց հաջողվեց 54 տոկոս քվե ստանալ և պահպանել իշխանությունը։ Նախկինները, իհարկե, չկարողացան կամ չուզեցան պարզ և հստակ խոսել ընտրողի հետ, արդյունքում այսօր Փաշինյանը կրկին վարչապետ է, իսկ երկրում քաղաքական ճգնաժամը մեղմվելու փոխարեն ավելի է խորացել։ Իսկ որքան էլ Նիկոլ Փաշինյանն ու իր սպասարկուները փորձեն նվազեցնել իրենց պատասխանատվությունը, միևնույն է՝ անգամ 99 տոկոս քվե ստանալու դեպքում «Քաղաքացիական պայմանագիրն» է կրում պատերազմում կրած աղետալի պարտության պատասխանատվությունը։

Արմեն Անդրեասյան