Ծանոթ ու միարժամանակ անհայտ … թղթախաղ Բրիջ
ՀԱՍԱՐԱԿՈՒԹՅՈՒՆ
Բրիջը ինտելեկտուալ թղթախաղ է: Բրիջ խաղում են զույգերով կամ թիմերով, խաղի համար օգտագործվում 52 խաղաքարտերի դասուկ, որոնք հավասարապես բաշխվում են խաղի բոլոր մասնակիցների միջև: Ավանդաբար խաղացողներին տրվում են աշխարհի մասերի անուններ՝ Արևմուտք և Արևելք զույգը հակադրվում է Հյուսիս և Հարավ զույգին: Խաղը խաղում են հերթով ժամացույցի սլաքի ուղղությամբ:
Ենթադրվում է, որ Բրիջը Անգլիա է եկել Հնդկաստանից կամ Մերձավոր Արևելքից: Օրինակ 19-րդ դարի սկզբին Ստամբուլում տարածված է եղել «կեդիվ» խաղը, որն իր կանոններով Բրիջ է հիշեցնում: Որոշ պատմաբաններ հակված են խաղի ծագման «ռուսական» վարկածին: Կան հիշատակումներ, որ Բրիջի նման խաղ Ռուսաստանում գոյություն է ունեցել 19-րդ դարի սկզբին: Դա եղել է«բիրիչ» խաղը («բիրիչ» բառից՝ ազդարար) կամ «ռուսական վիստը»: 19-րդ դարի վերջին Վիստը տարածվել է Կահիրե, Բալկաններ և Ֆրանսիայի հարավային ափեր, և այնտեղից արդեն հասել Անգլիա «Բիրիտչ կամ ռուսական վիստ» անվանմամբ (բառացիորեն թարգմանվում է որպես «ռուսական վիստի սուրհանդակ»):
Բրիջի զարգացումը և մասսայականացումը կարելի է ներկայացնել հետևյալ իրադարձությունների հաջորդականությամբ.
- 1894 թվականին թղթախաղերի օրենքներ գրելով հայտնի Լոնդոնի Պորտլենդ ակումբը հրապարակել է Բրիջ խաղի կանոնները, և նման կերպ նախաձեռնել է խաղի պաշտոնական ծնունդը: Մեկ տարվա ընթացքում Բրիջը տարածվել է ամբողջ Եվրոպայում և Ամերիկայում:
- 1903 թվականին Իռլանդացի հայտնի տեսաբան Օսվալդ Քրոուֆորդը խաղի նոր տարբերակ է մշակել, որտեղ զույգերը իրավունք են ստացել պայքարել մաստի ընտրության համար: Այդ փոփոխությունը կոչվել է Բրիջ-աճուրդ: Քրոուֆորդի նորամուծությունները մեծ ոգևորությամբ են ընդունվել: Այն սկսել է տարածվել Եվրոպայից և Ամերիկայից այն կողմ:
- 1917 - 1920 թվականներին Ֆրանսիայում հայտնվել է
Բրիջ- պլաֆոնդը, իսկ Ամերիկայում Բրիջ-կոնտակտը, որը Հարոլդ Ստերլինգ Վանդերբիլթի շնորհիվ դարձել է ժամանակակից Բրիջի ուղղակի նախորդը:
- 1926 թվականին հայտնի միլիոնատեր Հարոլդ Վանդերբիլտը, Հյուսիսային Ամերիկայում ճանապարհորդելիս, ազատ ժամանակն անցկացնելով ֆրանսիական Բրիջ խաղալով առաջարկել է միավորների հաշվարկի բոլորովին այլ կանոններ: Այսպիսով, հայտնվել է Բրիջ-կոնտակտի առավել ժամանակակից տարբերակը, որը կարճ ժամանակահատվածում ստվերել է խաղի այն բոլոր տարբերակները, որոնք գոյություն ունեին մինչ այդ ժամանակ:
- 1932 թվականին Վանդերբիլթի գաղափարները ճանաչվել և ընդգրկվել են Բրիջի առաջին միջազգային օրենսգրքում: Նույն թվականին հայտնվել է Բրիջի միջազգային լիգան, որը սկսում է ամեն տարի անցկացնել Եվրոպայի առաջնությունները:
- 1947 թվականին ստեղծվել է Բրիջի Եվրոպական լիգան (EBL):
- 1958 թվականին ստեղծվել է Բրիջի Համաշխարհային ֆեդերացիան (WBF):
Այսօր Բրիջի Եվրոպական լիգան ընդգրկում է շուրջ 30 երկիր, իսկ Բրիջի Համաշխարհային ֆեդերացիան միավորում է ավելի քան 100 ազգային ֆեդերացիաներ` ներառյալ Մերձավոր Արևելքը, Աֆրիկան և Չինաստանը: Պաշտոնական տվյալների համաձայն, մոլորակի ավելի քան 200 միլիոն մարդ Բրիջ է խաղում: Ռոնալդ Ռեյգանը, Սոմերսեթ Մոեմը, Դուայթ Էյզենհաուերը, Ուորեն Բաֆեթը, Օմար Շերիֆը, Մոհաթմա Գանդին և այլ շատ հայտնի անձնավորություններ սիրել են Բրիջ խաղալ: Բրիջը քարոզվում է ամբողջ աշխարհում և ընդգրկվում է ուսումնական ծրագրերում: Դա պարտադիր կարգ է Եվրոպայում ՆԱՏՕ-ի ակադեմիաներում և ուսումնական հաստատություններում: Սպորտային Բրիջը միակ ինտելեկտուալ թղթախաղն է, որը 1999 թվականին պաշտոնապես դարձել է օլիմպիական մարզաձև:
-
Նյութը հրապարակման պատրաստեց Կամո Խաչիկյանը
