Արտաքին ճնշումնե՞ր, թե՞ արցախյան խնդրի բռնի կարգավորում

Հայաստանի արտաքին գործերի նախարարի պաշտոնում «Օմեգա» մականունով հայտնի Արարատ Միրզոյանի նշանակումից հետո աննախադեպ ակտիվություն է նկատվում, հատկապես արևմտյան երկրների կողմից։ Նախօրեին Միացյալ Նահանգների պետքարտուղարությունը դատապարտել է հայ-ադրբեջանական սահմանի վերջին էսկալացիան, կողմերին հորդորել պահպանել հրադադարի հանձնառությունը և բանակցություններով հասնել հակամարտության տևական կարգավորմանը։ Իսկ Հայաստանում ԱՄՆ դեսպան Լին Թրեյսին հայտարարել է, թե Լեռնային Ղարաբաղում վերջին պատերազմի հետևանքները հաղթահարված չեն, հակամարտությունը կարգավորված չէ, քանի որ դեռևս լուծված չէ Լեռնային Ղարաբաղի կարգավիճակի հարցը:

«Մենք աշխատելու ենք որպես Մինսկի խմբի համանախագահ՝ այդ դիրքերից ձգտելով իրավիճակի դեէսկալացիայի, միջադեպերի վերացման, որպեսզի հնարավոր լինի դիտարկել մնացյալ հարցերը՝ պատերազմի հետևանքների և մյուս խնդիրների վերջնական կարգավորումը»,- Սյունիքի մարզում լրագրողների հետ զրույցում ասել է Լին Թրեյսին:

Ֆրանսիայի նախագահ Էմանուել Մակրոնն էլ հեռախոսազրույց է ունեցել Նիկոլ Փաշինյանի հետ, քննարկել են իրավիճակը տարածաշրջանում և տեղի ունեցող վերջին զարգացումները: ՀՀ կառավարության փոխանցմամբ, նրանք շեշտել են Մինսկի խմբի համանախագահության հովանու ներքո խաղաղ գործընթացի վերսկսման կարևորությունը՝ Լեռնային Ղարաբաղի հակամարտության քաղաքական կարգավորման համար:

Նախօրեին էլ Անվտանգության խորհրդի «նորանշանակ» քարտուղար Արմեն Գրիգորյանն է հարցազրույց տվել Հանրային հեռուստաընկերությանը, խոսելով Ադրբեջանի նախագահի կողմից անընդհատ օրակարգ բերվող խաղաղության պայմանագրի մասին, շեշտել է՝ նման առաջարկ չենք ստացել, խաղաղության պայմանագիրը հնարավոր է կնքել Արցախի հարցի լուծման դեպքում. «Մենք պատրաստ ենք ԵԱՀԿ Մինսկի խմբի շրջանակներում Լեռնային Ղարաբաղի համապարփակ և երկարաժամկետ լուծման շուրջ բանակցություններ սկսել, և դա կլինի լավագույն խաղաղության պայմանագիրը»,- ասել է նա:

Ակնհայտ է, որ Արցախի հարցում ինչ-որ լուրջ զարգացումներ են սպասվում, որոնց վերաբերյալ, ինչպես միշտ հայ հանրությունը տեղեկանալու է պոստ-ֆակտում, երբ բանը բանից անցած լինի։ Համենայն դեպս, թե՛ Արևմուտքի նման ակտիվացումը, թե՛ Ադրբեջանի հռետորաբանության կոշտացումը, և թե՛ ՌԴ նյարդային հայտարարությունները որևէ լավ բան չեն հուշում։

Գուրգեն Դարբինյան