Ռուսաստանի կոշտ պատասխանը Ալիևին

Ռուսաստանի ԱԳՆ-ն կոշտ պատասխան է տվել Իլհամ Ալիևին, որը հորդորել էր Ռուսաստանին զենք չվաճառել Հայաստանին։ Օգոստոսի 11-ին Ռուսաստանի պաշտպանության նախարար Սերգեյ Շոյգուն Հայաստանի իր պաշտոնակից Արշակ Կարապետյանի հետ Մոսկվայում հանդիպմանը հայտարարել էր, որ Ռուսաստանը պատրաստ է օգնել Հայաստանին արդիականացնելու բանակը։ Ադրբեջանի նախագահ Իլհամ Ալիևն էլ նախորդ շաբաթ CNN Turk-ին տված հարցազրույցում մեղադրել էր Հայաստանին Ադրբեջանի հետ խաղաղության պայմանագիր չստորագրելու և ռևանշիստական տրամադրությունների համար և «անտրամաբանական» անվանել Հայաստանին զենք մատակարարելու ռուսական կողմի հայտարարությունները։

«Մոսկվան հաշվի է առնում տարածաշրջանում ուժերի հավասարակշռության պահպանման անհրաժեշտությունը: Ռուսաստանի կողմից զենքի արտասահմանյան մատակարարումների իրականացումը նրա ինքնիշխան իրավունքն է։ Մենք շատ ենք կարդում և լսում այդ մասին, բայց կուզեի ուշադրություն դարձնել, որ մենք ունենք համապատասխան փոխգործակցություն ինչպես Հայաստանի, այնպես էլ Ադրբեջանի հետ»,- ասել է Ռուսաստանի ԱԳՆ խոսնակ Մարիա Զախարովան՝ ԱԳՆ-ում կազմակերպված իր շաբաթական ճեպազրույցում։

Ռուսաստանի այս նյարդային պատասխանը վկայում է, որ Կրեմլը բնավ մտադիր չէ Հարավային Կովկասում զիջել իր դիրքերը, իսկ զենքի առևտուրը ազդեցության պահպանման կարևորագույն լծակն է Ռուսաստանի համար։ Ադրբեջանը Թուրքիայի աջակցությամբ 44-օրյա պատերազմից հետո փորձում է թուլացնել Ռուսաստանի դերը, ինչը բոլորովին էլ չի տեղավորվում ՌԴ ցանկությունների և հնարավորությունների ծիրում։

Հայկ Առաքելյան