ՔՊ-ն անակնկալներ է պատրաստել ընդդիմադիր թեկնածուների համար

Ազգային ժողովը 12 հանձնաժողով ունի, որոնցից երեքը, Դոնթի բանաձևի համաձայն, պետք է գլխավորեն ընդդիմության ներկայացուցիչները։ «Հայաստան» դաշինքը հայտարարել է, թե ստանձնելու են Տնտեսական հարցերի, Տարածաշրջանային և եվրասիական ինտեգրման հարցերի, Մարդու իրավունքների պաշտպանության և հանրային հարցերի մշտական հանձնաժողովների նախագահությունը։ Ընդ որում, «Հայաստան» դաշինքը վերջին հանձնաժողովի նախագահի պաշտոնը զիջելու է «Պատիվ ունեմ» դաշինքին։ Տնտեսական հարցերի հանձնաժողովի նախագահի պաշտոնում «Հայաստան» դաշինքը առաջադրել է «Վերածնվող Հայաստան» կուսակցության նախագահ Վահե Հակոբյանի թեկնածությունը, Տարածաշրջանային և եվրասիական ինտեգրման հարցերի հանձնաժողովի համար էլ՝ նախկին փոխվարչապետ Արմեն Գևորգյանի թեկնածությունը։ «Պատիվ ունեմ» դաշինքն էլ Մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնում կառաջադրի Թագուհի Թովմասյանի թեկնածությունը։

 

«Քաղաքացիական պայմանագիրը» որոշել է վրեժ լուծել այս օրերին ընդդիմության բուռն և կոշտ քննադատությունների համար, հանձնարարվել է լավ պատրաստվել և անհարմար հարցեր տալ ընդդիմության թեկնածուներին։ Եվ իշխանականները քրքրում են երկու թեկնածուների կենսագրությունները, նրանց դեմ հարուցված քրեական գործերը։ Այդուհանդերձ, մեր աղբյուրի փոխանցմամբ, որոշվել է անհրաժեշտ քվեները ապահովել և երկու թեկնածուներին էլ ընտրել հանձնաժողովի նախագահի պաշտոնում։ «Քաղաքացիական պայմանագիրը», սակայն, մտադիր է հիմնովին ձախողել Թագուհի Թովմասյանի ընտրությունը։

 

Փաշինյանականները չեն կարողանում ներել, որ 2018-ին իրենց ցուցակով պատգամավոր դարձած Թովմասյանը պատերազմից հետո հեռացավ խմբակցությունից, կոշտ քննադատության ենթարկեց իրենց, այժմ էլ ընդդիմության կողմից հավակնում է զբաղեցնել կարևոր հանձնաժողովներից մեկի նախագահի պաշտոնը։ Ընդ որում, իշխանությունը փորձել է համաձայնության գալ «Պատիվ ունեմ» դաշինքի հետ, որ փոխեն իրենց թեկնածուին, սակայն ապարդյուն։ Ընդդիմությունն էլ ձեռքերը ծալած չի նստել, և լուրջ կռիվ է տալու իր թեկնածուների համար։