Պոպուլիզմը՝ Հայաստանի ամենամեծ սպառնալիք

Մարդկության պատմության ողջ ընթացքը վկայում է, որ պոպուլիզմը կարող է ծիլեր տալ և աճելու պարարտ հող ունենալ միայն հասարակության ծայրաստիճան բևեռացվածության պայմաններում։ Ընդ որում, ոչ միայն սոցիալական, այլև տնտեսական, քաղաքական, մշակութային, կրթական բևեռացվածության պայմաններում։ Նիկոլ Փաշինյանը մեր օրերի լրջագույն սպառնալիքն է Հայաստանի Հանրապետության համար, և հենց հասարակության բևեռացվածության պտուղն է։ Հանրային այսպիսի բևեռացվածության պայմաններում չէր կարող այլ քաղաքական ուժ գալ իշխանության, քան պոպուլիստ, անպատասխանատու, տխեղծ ու գաղափարազուրկ «Քաղաքացիական պայմանագիրը»։ Գեղջկական խորամանկությամբ իշխանության գալը բավարար չէր, միայն այսպիսի որակներ կրող ուժը կարող էր պատերազմում սեփական մեղքով կրած խայտառակ պարտությունից հետո կրկին վերընտրվել։ Հանրության 53,91 տոկոսը, պարզվեց, նույն գաղափարների կրողն է, անվտանգությունն ու պետականությունը ստորադասում է սեփական որկորին։

Նախկին իշխանությունները, որոնք խորհրդարանական արտահերթ ընտրություններում հիմնական ընդդիմադիր ուժերն էին, ունեն իրենց զգալի մեղքը ստեղծված իրավիճակի համար։ 28 տարին բավարար էր ժողովրդի բևեռացվածությունը վերացնելու, կրթելու և ազնվացնելու, նվազագույն անհրաժեշտ կենսամակարդակ ապահովելու համար, փոխարենը կամա, թե ակամա ընտրվեց հանրությանը դեգրադացնելու ուղին, որն էլ հանգեցրեց ստորին բնազդներով գոյատևող քաղաքական թիմի հաղթանակին։ Ժամանակին ինքնիշխանության ամեն փշուրի համար կռիվ տվող ազգից մնաց մի զանգված, որին կարողանում են պառակտել «հայաստանցի-ղարաբաղցի» թեզերով։ 2021-ին Նիկոլ Փաշինյանը մնաց իշխանության։ Սխալ կլինի կարծել, թե նա չի հասկանում իր հաջողության հիմնական պատճառը։ Իշխանության ղեկը իր ձեռքում պահելու համար Փաշինյանը ՀՀ բնակչությանը պետք է պահի բևեռացվածության, պառակտման ճիրաններում, ավելի խորացնի այդ պառակտումը, ներքին թշնամու կերպարով կերակրի իր կողմնակիցներին՝ երկրի հիմնական խնդիրներից շեղելու համար։ Հետևաբար, Հայաստանը չի կարող հաջողել, քանի դեռ իշխանության Նիկոլ Փաշինյանի թիմն է։ Չի կարող ստեղծել լուրջ արժեք, ապահովել իր անվտանգությունը, տնտեսական և մշակութային առաջընթաց գրանցել, քանի դեռ իր վարչապետը Նիկոլ Փաշինյանն է։ Եվ հենց սա է Հայաստանի մեծագույն ողբերգությունը։

Գագիկ Ներսեսյան