Ռոբերտ Քոչարյանը պատգամավոր չի դառնա

Հայաստանի երկրորդ նախագահ Ռոբերտ Քոչարյանը հրաժարվել է պատգամավորի մանդատից։ Երկրորդ նախագահը երեկ հայտարարություն է տարածել և նշել, թե «Հայաստան» դաշինքի պաշտոնական ներկայացուցիչ Արամ Վարդևանյանը ԿԸՀ է ներկայացրել պատգամավորի մանդատից հրաժարվելու՝ իր որոշման մասին դիմումը:

«Այնպես է ստացվել, որ ժամանակին եղել եմ թե՛ Արցախի, թե՛ Հայաստանի խորհրդարանների պատգամավոր, սակայն բնավորության կերտվածքով միշտ հանդիսացել եմ գործադիր իշխանության մարդ։ Համոզված եմ, որ հիմա ավելի ճիշտ է տեղս զիջել թիմակիցներիս, որոնցից յուրաքանչյուրը, վստահ եմ, լավ պատգամավոր է դառնալու»,- նշել է Քոչարյանն ու հավելել․ «Այս քայլով նաև իմ համաձայնությունն եմ հայտնում հազարավոր թիմակիցներիս, որոնք ինձ են փոխանցել այդ կարծիքը, որ Արցախի Հանրապետության ու Հայաստանի Հանրապետության Նախագահի պաշտոններից հետո չպետք է գայթակղվեմ պատգամավորի մանդատով։ Վերջապես, ինձ ձայն էին տալիս որպես Դաշինքի վարչապետի թեկնածու»։

Միաժամանակ, երկրորդ նախագահը շեշտել է, թե Ազգային Ժողով իր չգնալը չի նշանակում դուրս գալ պայքարից։ Արտահերթ ընտրություններից հետո իշխանական մամուլը ապատեղեկատվություն էր տարածում՝ իբր երկրորդ նախագահը վերցնելու է մանդատը, որպեսզի անձեռնմխելիություն ստանա։ Այս պնդումներն, իհարկե, զուրկ են որևէ տրամաբանությունից։ Խորհրդարանում գերակշիռ մեծամասնություն ունեցող ուժի համար բարդ չէր լինի որևէ պատգամավորի զրկել այդ անձեռմխելիությունից։ Իսկ շարքային ընդդիմադիր լինելը հարիր չէ ՀՀ նախկին նախագահի և ընդդիմադիր գլխավոր ուժի առաջնորդի համար։ Միևնույն ժամանակ, Ռոբերտ Քոչարյանի որոշումը վկայում է պետականության և դրա ատրիբուտների նկատմամբ «Հայաստան» դաշինքի հարգանքը։ ՀՀ նախագահի պաշտոնը զբաղեցրած մարդը, անկախ իր անձից և հանրության մեջ եղած ընկալումներից, չի կարող նստել որպես շարքային պատգամավոր նստել մի դահլիճում, որտեղ տոն են տալիս ալենսիմոնյաններն ու լենանազարյանները։

Սամվել Երիցյան