Պողպատե մանդատի ոդիսականը․ Փաշինյանը կրակում է իր իսկ ոտքին

Իր անփառունակ պաշտոնավարման երեք տարիների ընթացքում Նիկոլ Փաշինյանը միայն մի դաս է լավ սերտել՝ իշխանությունն ամեն գնով պահելու համար պետք է հետապնդել և մեկուսացնել քաղաքական բոլոր հակառակորդներին։ Եվ այժմ, առանց դադարի զբաղվում է այդ գործով՝ կալանավորելով բոլորին, ովքեր համարձակվել են իրեն մի թթու խոսք ասել։ Նույնիսկ ռուսական լրատվամիջոցներն են արձանագրում, որ «այն զգացողությունն է, թե Փաշինյանը պարզապես փորձում է վրեժ լուծել այն մարդկանցից, ովքեր լրջորեն նյարդայնացրել են իրեն»: Սյունիքի մարզի կալանավորված համայնքապետերի շարքը նախօրեին լրացրեց Սիսիանի համայնքապետ, «Վերածնվող Հայաստան» կուսակցության անդամ Արթուր Սարգսյանը։

Հուլիսի 13-ին ՀՀ գլխավոր դատախազությունը կենտրոնական ընտրական հանձնաժողով միջնորդություն էր ներկայացրել Սիսիանի համայնքապետ Արթուր Սարգսյանին անձեռնմխելիությունից զրկելու համար: Մենք վաղուց էինք արձանագրել, որ Նիկոլ Փաշինյանի «պողպատե մանդատն» ու մուրճը աշխատելու են միայն քաղաքական հակառակորդների դեմ, իսկ յուրայինները ոչ միայն չեն հետապնդվելու իրենց հանցագործությունների համար, այլ մի բան էլ՝ նոր հանցանքներ կատարելու ինդուլգենցիա են ստանալու Նիկոլ Փաշինյանից։ Հետապնդումները միայն առանձին անհատներով չեն սահմանափակվելու, այլև խոշոր ձեռնարկություններով, որոնց ղեկավարները, ըստ իշխանության ներկայացուցիչների, կարող են կապ ունենալ ընդդիմության հետ։

«Զանգեզուրի պղնձամոլիբդենային կոմբինատն» ընդամենը առաջինն է այդ շարքում։ Մեր տեղեկություններով առաջիկայում հետապնդումներ են սկսվելու նաև այլ ձեռնարկությունների դեմ։ Իզուր չէ, որ Փաշինյանը որոշել է ազատվել ՊԵԿ նախագահ Էդուարդ Հովհաննիսյանից, և նրա փոխարեն նշանակվում է արդարադատության նախարար Ռուստամ Բադասյանը։ Վերջինս էլ համակարգելու է իշխանությանը չհարող ընկերությունների դեմ հարկային տեռորը։ Փաշինյանին, իհարկե, չի անհանգստացնում, որ խոշոր ընկերությունների դեմ արշավը վաելու է հնարավոր ներդրողներին, որոնք չեն ցանկանում գումարներ բերել Հայաստան։ Իսկ շատ ընկերություններ էլ հարկադրված կհեռանան մեր երկրից։ Ռուսական RiaFan գործակալությունն այդ կապակցությամբ գրում է․ «Դա փչացնում է երկրի տնտեսական միջավայրը, և դրանով իսկ ամեն ինչ շատ վատ է լինում: Նման գործողություններով Փաշինյանը կրակում է իր իսկ ոտքին: Այն զգացողությունն է, որ նա պարզապես փորձում է վրեժ լուծել այն մարդկանցից, ովքեր լրջորեն նյարդայնացրել են իրեն»:

Կարեն Լևոնյան