Սահմանադրական դատարանը բավարար կամք չունեցավ երկիրը ճգնաժամից հանելու

Հայաստանի Սահմանադրական դատարանը նախօրեին հրապարակեց խորհրդարանական արտահերթ ընտրությունների արդյունքների չեղարկման հարցով չորս քաղաքական ուժերի դիմումների վերաբերյալ իր վճիռը, և անփոփոխ թողեց ընտրությունների արդյունքների վերաբերյալ ԿԸՀ-ի որոշումը։ Դիմող կողմից «Պատիվ ունեմ» դաշինքի ներկայացուցիչ Դավիթ Հարությունյանն ասաց` որոշումը սպասելի էր.

«Որոշումն ակնկալելի էր, ինչի մասին հայտնել եմ»։

Մյուս դիմումատու, երկրորդ նախագահ Ռոբերտ Քոչարյանի «Հայաստան» դաշինքը ներկայացնող Արամ Վարդևանյանն ասում է` քաղաքական ճնշումները Սահմանադրական դատարանի նկատմամբ ակնհայտ էին։ «Հայոց հայրենիք» կուսակցությունն էլ մտադիր է ՍԴ վճիռը բողոքարկել Եվրոպական դատարանում։

Փաստացի Սահմանադրական դատարանի 9 դատավորների մեծ մասը քաղաքական կամք չունեցավ երկիրը ճգնաժամից դուրս բերելու համար և քվեարկեցին Նիկոլ Փաշինյանի իշխանության պահանջով։ Վճռի հրապարակումից հետո տարբեր ԶԼՄ-ներ, ՍԴ-ի ներքին անցուդարձին ծանոթ անձինք նշում են, թե առնվազն երեք դատավորներ փորձել են դիմադրել, դեմ են քվեարկել ազգակործան վճռին, սակայն պարզվեց Նիկոլ Փաշինյանի դիրքերն ավելի ամուր էին։ Նրան հաջողվեց երեք տարում Սահմանադրական դատարանը վերաձևել իր պատկերացումներով, իր կողմնակիցներով, կամ կոմպրոմատի ծանրության տակ կքածներով վճիռ կայացնել՝ ընդդեմ Հայաստանի Հանրապետության։

Իսկ առաջիկայում ԿԸՀ-ն կբաշխի մանդատները․ նոր խորհրդարանը կազմված կլինի 107 պատգամավորից։ «Քաղաքացիական պայմանագիր» կուսակցությունը կունենա 71 մանդատ, «Հայաստան» դաշինքը` 29, «Պատիվ ունեմ» դաշինքը՝ 7 մանդատ։ 8-րդ գումարման խորհրդարանի առաջին նիստը կայանալու է օգոստոսի 2-ին, որից հետո էլ կկազմավորվի նոր կառավարությունը։

Գարիկ Սամսոնյան