Արևմուտքն ակտիվանում է Հայաստանում
ՎԵՐԼՈՒԾՈՒԹՅՈՒՆՆԵՐ
Արևմուտքն ակտիվանում է Հայաստանում՝ արցախյան պատերազմում կրած խայտառակ պարտությունից հետո, և այս հանգամանքը չի կարող մտահոգություններ չառաջացնել։ Օրեր առաջ հայտնի դարձավ, որ Եվրամիությունը Հայաստանում «առաջնահերթ հատուկ ծրագրերի» իրականացման համար կարող է 2,6 մլրդ եվրո մոբիլիզացնել Հայաստանի համար: Իսկ երեկ երկօրյա այցով Հայաստան է ժամանել Եվրոպական խորհրդի նախագահ Շառլ Միշելը։ Կառավարության տարածած հաղորդագրության համաձայն՝ այցի շրջանակում Շառլ Միշելը կհանդիպի վարչապետի պաշտոնակատար Նիկոլ Փաշինյանին: Հանդիպումից հետո Նիկոլ Փաշինյանը և Շառլ Միշելը ԶԼՄ ներկայացուցիչների համար հանդես կգան բանակցություններն ամփոփող հայտարարություններով: Շառլ Միշելին, ի դեպ, դաշնակցական երիտասարդները երեկ դիմավորել են բողոքի գործողություններով։
Բուռն ակտիվացման քայլեր են նկատվում նաև Միացյալ Նահանգների կողմից։ ԱՄՆ-ում գործող հայկական լոբբիստական ազդեցիկ կառուցներից մեկի՝ Ամերիկայի Հայկական համագումարի համանախագահ Էնթոնի Բարսամյանը օրերս հայտարարեց, թե Միացյալ Նահանգներն ուսումնասիրում է, թե ինչ նախագծեր կարող է իրականացնել Հայաստանի ենթակառուցվածքներում:
«Կարծում եմ՝ ԱՄՆ նախագահ Բայդենի վարչակազմը ակտիվացնում է իր քաղաքականությունը այս տարածաշրջանում։ Բայդենի վարչակազմն ավելի լավ է հասկանում այս տարածաշրջանը, ուստի ներգրավված են»,- նշել է նա։
ԵԱՀԿ Մինսկի խմբի համանախագահ երկրի պետքարտուղարությունն էլ երեկ մի շրջաբերական է փոխանցել «Ամերիկայի ձայն»-ի հայկական ծառայությանը, որւմ նշել է, թե իր աջակցությունն է հայտնում ԵԱՀԿ Մինսկի խմբի համանախագահության շրջանակում ղարաբաղյան հարցի խաղաղ կարգավորմանը։
«Մեզ խորապես մտահոգում է անցյալ աշնանը Հայաստանի և Ադրբեջանի միջև հակամարտության վերսկսման ազդեցությունը, հստակ գիտակցում ենք տարածաշրջանում առկա մարդասիրական կարիքները», - նշել է Պետքարտուղարությունը:
Արևմուտքի կողմից բոլոր այս քայլերը վկայում են, որ նրանց խորապես հուզում է Ռուսաստանի ազդեցության աճը տարածաշրջանում, և փորձում են ֆինանսական և քաղաքական միջոցներով հակազդել Ռուսաստանին։ Լա՞վ է, թե՞ վատ, կերևա ապագայում։
Ալեն Կիրակոսյան
