Իրավապահ համակարգը՝ գերի Փաշինյանի ձեռքում․ հետապնդումները նոր թափ են հավաքում

Հայաստանի իրավապահ համակարգը գերի է դարձել Նիկոլ Փաշինյանի ձեռքում և ինքնամոռաց կատարում է նրա բոլոր ապօրինի հրամանները։ Իսկ հրամանը, կարծես, մեկն է՝ ամեն գնով հետապնդել Փաշինյանի քաղաքական հակառակորդներին։ Հետպատերազմյան խնդիրները լուծելու, երկրում քրեածին իրավիճակը վերահսկելու փոխարեն իրավապահները բոլոր ուժերը նետել են Սյունիքի ընդդիմադիր համայնքապետերին, «Վերածնվող Հայաստան» կուսակցության ազդեցիկ անդամներին ձերբակալելու գործին։ Այս կեսգիշերին ոստիկանները հերթական ապօրինությունն են արել։ Փաստաբան Երեմ Սարգսյանն իր էջում գրել է, որ ժամը 00:00-ի սահմաններում իր վստահորդի՝ Մեղրիի նախկին քաղաքապետ Մխիթար Զաքարյանի հետ գնացել են քրեական ոստիկանության գլխավոր վարչության շենք, հայտնել, որ ինքնակամ ներկայացել են։

Հիշեցնենք՝ ԿԸՀ-ն երեկ բավարարել էր դատախազության միջնորդությունը՝ Մեղրի համայնքի նախկին քաղաքապետ, «Հայաստան» դաշինքի պատգամավորության թեկնածու Մխիթար Զաքարյանի նկատմամբ քրեական հետապնդում հարուցելու մասին: Ոստիկանությունում Զաքարյանին խնդրել են փոքր-ինչ սպասել, րոպեներ անց ժամանել են երկու միկրոավտոբուսներ, և դուրս թափված տասնյակ դիմակավորված ոստիկանները հենց տենց Մխիթար Զաքարյանին պառկեցրել են գետնին, տեսագրել, որ հետագայում ցույց տան, իբր իրենք են գտել և բերման ենթարկել պատգամավորի թեկնածուին։

Փաստաբանի խոսքով, իրավապահները երկու օր կեղծ հիմքեր են ստեղծում՝ Մխիթար Զաքարյանի ձերբակալության համար, օրինակ, գնում են Զաքարյանի տուն, սակայն ծանուցագիրը միտումնավոր չեն փոխանցում, իսկ արձանագրություններում գրում են, թե Զաքարյանին գտնել չի հաջողվել։ Երեկ էլ կալանավորվել է «Վերածնվող Հայաստանի» մեկ այլ ներկայացուցիչ՝ Քաջարանի քաղաքապետ Մանվել Փարամազյանը, քրեական հետապնդումներ են սկսվել նաև Գորիսի քաղաքապետի, Գորիսի վարչական բնակավայրերի ղեկավարների դեմ։ Բոլոր այս դրվագները և իրավապահ մարմինների վարքը վկայում են՝ Նիկոլ Փաշինյանը պատրաստ է գնալ ցանկացած իրավախախտման, միայն թե թուլացնի քաղաքական հակառակորդներին։ Նյութն արդեն պատրաստ էր հրապարակման, երբ հերթական «զավեշտալի» տեղեկությունը ստացանք։ Հայաստանի կառավարությունն այսօր արտահերթ և դռնփակ նիստ է գումարելու, և ոչ անհայտ Արգիշտի Քյարամյանին նշանակելու է Քննչական կոմիտեի նախագահ։

Միքայել Սարգսյան