«Քաղաքացիական պայմանագրին» ծանր օրեր են սպասվում խորհրդարանում

8-րդ գումարման Ազգային ժողովում տեսարանների պակաս հաստատապես չենք ունենա։ Արտահերթ ընտրությունների նախնական արդյունքներով՝ խորհրդարանում «Քաղաքացիական պայմանագիրը» կունենա 71 պատգամավոր, ընդդիմադիր «Հայաստան» դաշինքը՝ 29, «Պատիվ ունեմ» դաշինքը՝ 7 պատգամավոր։ Թեև Նիկոլ Փաշինյանին հաջողվեց առայժմ սահմանադրական մեծամասնություն ապահովել, սակայն իշխող ուժին լուրջ փորձություն է սպասվում։ Փաշինյանի խմբակցությունը երեք տարում ապացուցել է իր ապիկար էությունը, իսկ պատգամավորների մեծամասնությունն ընդհանրապես չի տիրապետում մասնագիտական հմտությունների։ Իզուր չէ, որ նրանց ծաղրում, «մանկապարտեզ» էին անվանում նույնիսկ Նիկոլ Փաշինյանի կողմնակիցները։

Նոր խմբակցությունում նաև չափազանց քիչ են քաղաքական դեմքերը՝ կայուն սկզբունքներով և ձևավորված արժեհամակարգով։ Փոխարենը, ընդդիմադիր երկու խմբակցությունները խորհրդարան են տանում հիմնականում պետական կառավարման մեծ փորձ ունեցող, պատրաստված պատգամավորների։ Եթե հաշվի առնենք նաև այդ խմբակցությունների արմատական տրամադրվածությունը, ապա վստահ կարելի է ասել՝ 36 ընդդիմադիրները լիովին բավարար են իմքայլականների տրամադրությունը հիմնովին փչացնելու համար։ 7-րդ գումարման խորհրդարանում Փաշինյանը հաճախ կարողանում էր քաղաքական պայմանավորվածությունների հանգել «Լուսավոր Հայաստանի» և «Բարգավաճ Հայաստանի« հետ, այդ երկու ուժերն էլ խորհրդարան էին անցել՝ հայտարարելով, թե աջակցել են հեղափոխությանը։ Հատուկենտ պատգամավորներ էին արմատական դիրքերից հանդես գալիս։ Իսկ այժմ երկու ամբողջական խմբակցություն օրուարև չեն տալու Նիկոլ Փաշինյանին։ Հատկապես, նստաշրջանի օրերին, երբ վարչապետը ստիպված է լինելու ներկայանալ ԱԺ և պատասխանել պատգամավորների հարցերին։

Կարեն Միքայելյան