Իրանը նոր նախագահ ունի․ ինչպե՞ս դա կազդի Հայաստանի վրա

Իրանը նոր նախագահ ունի, երեկ կայացած ընտրություններում ձայների ահռելի տարբերությամբ հաղթանակ է տարել պահպանողական գործիչ, դատական իշխանության ղեկավար Էբրահիմ Ռաիսին։ Նախապես հայտ ներկայացրած մի քանի տասնյակ գործիչներից ընտրություններին մասնակցելու թույլտվություն տվել էին միայն յոթին, որոնցից երեքն էլ վերջին պահին ինքնաբացարկ էին ներկայացրել։ Իսլամական հեղափոխության պահապանների կորպուսը ընտրության էր թողել միայն պահպանողական գործիչներին, չափավոր բարեփոխականները դուրս էին մնացել ընտրապայքարից։

Ընտրություններին մասնակցող 28,6 միլիոն ընտրողներից 17,6 միլիոնն իրենց քվեն տվել են Ռաիսիին, իսկ մերձավոր մրցակից Մոհսեն Ռեզային ստացել է միայն 3,3 միլիոն քվե։ Հայաստանի մերձավոր հարևան երկրում նախագահական ընտրությունների դերը բարդ է գերագնահատել։ Իրանը երեք տասնամյակ սերտորեն կապված է Հայաստանի հետ, բազմաթիվ անգամներ օգնել և աջակցել է Հայաստանին, հատկապես հայ-ադրբեջանական կոնֆլիկտում։

Հայաստանի գործող իշխանությունները՝ Նիկոլ Փաշինյանի գլխավորությամբ, երեք տարում կարողացել էին լիովին փչացնել հարավային հարևանի հետ հարաբերությունները, իսկ խորհրդարանում ոմն Կոնջորյան Իրանին «ավտորիտար» պետություն էր անվանել։ Արցախյան 44-օրյա պատերազմում Իրանն առանձնապես ջանք չգործադրեց Հայաստանին օգնելու, իսկ շատ պաշտոնյաներ ադրբեջանամետ հայտարարություններ արեցին։ Վաղը ընտրություններ են Հայաստանում, և լրջագույն հնարավորություն կա, որ Հայաստանն էլ առաջիկայում նոր և ավելի հմուտ ղեկավարներ կունենա։ Սա լավ առիթ է երկու երկրների հարաբերությունները վերագործարկելու, համագործակցությունը նոր էջից սկսելու համար։