Վտանգավոր գործընթացներ․ ԱՄՆ-ի ակտիվացումը Անդրկովկասում հարվածի տակ է դնում Ռուսաստանի խաղաղապահական ջանքերը
ՔԱՂԱՔԱԿԱՆՈՒԹՅՈՒՆ
politexpert.net-ը գրում է, որ ըստ քաղաքագետ Անդրեյ Արեշևի` ուժային տարբեր կենտրոնների, այդ թվում` Ռուսաստանի, Արևմուտքի և Մերձավոր Արևելքի երկրների նպատակաուղղվածությունը դեպի Անդրկովկաս կարող է վտանգավոր գործընթացներ առաջացնել տարածաշրջանում:
Բրյուսելում ՆԱՏՕ-ի գագաթնաժողովի նախօրեին Անդրկովկասի երկրներ է այցելել ԱՄՆ-ի Եվրոպայի և Եվրասիայի հարցերով պետքարտուղարի օգնականի պաշտոնակատար Ֆիլիպ Ռիկերը: Վրաստանի պաշտպանության նախարար Ջուանշեր Բուրչուլաձեի հետ հանդիպմանը նա բարձրացրել է Սև ծովի և Անդրկովկասի տարածաշրջանի անվտանգությանն առնչվող հարցեր և ՆԱՏՕ-ի հետ ռազմական համագործակցության զարգացման հեռանկարները: Վրաստանից հետո Ռիկերը այցելել է Ադրբեջան և Հայաստան, որտեղ պետությունների բարձրաստիճան պաշտոնյաների հետ քննարկել է գործընկերության զարգացման հարցեր:
Անդրկովկասում ԱՄՆ-ի նպատակները հայտնի են վաղուց. ստեղծել ինքնուրույն կամ ՆԱՏՕ-ի գործընկերների օգնությամբ միասնական արևմտամետ աշխարհաքաղաքական տարածք: Արեշևի կարծիքով այդ առումով Վաշինգտոնը նշանակալի հաջողությունների է հասել:
«Դա նախ և առաջ Հայաստանի հետագա վերակողմնորոշումն է դեպի ԱՄՆ-ի և Արևմտյան Եվրոպայի հետ հարաբերությունների սերտացումը, ինչպես նաև Ադրբեջանի և Վրաստանի հետ կապերի ամրապնդումը: Վերջինս, ինչպես ասել է Ռիկերը, շարունակում է մնալ Հարավային Կովկասում ամերիկացի գլխավոր գործընկեր», - պարզաբանել է «PolitExpert»-ի զրուցակիցը:
Ըստ Արեշևի` ուժային տարբեր կենտրոնների ընդհանուր ուշադրությունը կարող է տարածաշրջանում վտանգավոր գործընթացներ առաջացնել: Ուստի արևմտյան քաղաքական գործիչները, այդ թվում Հայաստանում ԱՄՆ դեսպան Լին Թրեյսին, ակտիվություն են ցուցաբերում: Նրանք սատարում են Նիկոլ Փաշինյանի ռեժիմին, որն առաջարկում է խաղաղապահներ տեղակայել ոչ միայն Ռուսաստանից, այլ նաև Ֆրանսիայից և ԱՄՆ-ից որպես ԵԱՀԿ Մինսկի խմբի համանախագահներ:
«Դա կհանգեցնի լուրջ բացասական հետևանքների, հայոց պետականության հետագա փլուզման, քանի որ երրորդ երկրները, ոչ միայն եվրոպական, այլ նաև Իրանը և Թուրքիան, կարող են իրենց հարաբերությունները սկսել պարզել բուն Հայաստանի տարածքում», - զգուշացրել է փորձագետը:
Ռուսաստանը, որը պատմականորեն ազդեցություն ունի Անդրկովկասում, ի պատասխան տարածաշրջանում Միացյալ Նահանգների ակտիվացման, կարող է պատասխանել միայն խաղաղության և ժողովրդավարության կոչերով, ինչպես դա անում է Ադրբեջանի և Հայաստանի դեպքում: Ընդհանրապես, այժմ Ռուսաստանը ազդեցության քիչ լծակներ ունի Անդրկովկասի երկրների վրա, ընդ որում Թբիլիսիի հետ լիարժեք դիվանագիտական հարաբերությունների բացակայության պայմաններում:
«Առաջին հերթին, Ռուսաստանը կձգտի կանխել Հայաստանի և Ադրբեջանի միջև առճակատման սրացումը, որոնք բավականին բարդ, նույնիսկ պայթյունավտանգ հարաբերությունների մեջ են: Հայաստանի Սյունիքի և Գեղարքունիքի մարզերում սահմանային սրման հավանականությունը մնում է և առաջացնում հայերի շրջանում հակառուսական տրամադրությունների աճի», - ընդգծել է «PolitExpert»- ի զրուցակիցը...
Նյութը հրապարակման պատրաստեց Կամո Խաչիկյանը
