Ծանոթ ու միաժամանակ անհայտ՝ գինի «գլինտվեյն»
ՀԱՍԱՐԱԿՈՒԹՅՈՒՆ
Կան շատ ջերմացնող ըմպելիքներ, այնուամենայնիվ, կա ըմպելիքի մի հատուկ տեսակ, որը շատերն են սիրում խմել սառնամանիքից հետո որպեսզի տաքանան, հյուրասիրեն ընկերներին և վայելեն խմիչքի համը: Խոսքը, իհարկե, Գլինտվեյն գինու մասին է:
Գլինտվեյն գինու առաջացման պատմությունը մեզ տանում է Հին Հռոմ: Հենց այնտեղ են առաջին անգամ տարբեր համեմունքներ կարմիր գինիների հետ խառնելու փորձեր կատարվել: Հռոմեացիներն այդ կերպ փորձել են բարելավել գինու համային հատկությունները, նրան տալ ավելի նրբագեղ երանգ: Բացի այդ, համեմունքների ավելացումը ապահովել է դրանց օգտակար հատկությունների պահպանումը: Սակայն հռեոմացիները գինին չեն տաքեցրել: Ավելի ուշ միջնադարյան Եվրոպայում են սկսել տաքացնել համեմված գինիները: Դրա համար օգտագործվել են ֆրանսիական խաղողի այգիների գինիները: Մեզ ծանոթ Գլինտվեյն գինու բաղադրատոմսը կազմվել է 14-րդ դարի վերջին: Դրա հեղինակն առաջարկել է չոր կարմիր գինուն ավելացնել սև պղպեղ, դարչին, շաքար, կոճապղպեղ, մեխակ և մշկընկույզ: Այդ ժամանակից ի վեր այն համարվում է ավանդական Գլինտվեյն գինու բաղադրատոմսը:
«Գրինտվեյն» անունը գալիս է գերմանական «glühwein»-ից, որը կրճատված «glühenderwein»-ն է, և, համապատասխանաբար, թարգմանվում է որպես «տաք գինի»: Բանն այն է, որ համեմված գինին պետք է նաև տաքեցնել: Հետագայում այդ գինին դարձել է բոլոր տեսակի եվրոպական տոնավաճառների անբաժանելի ավանդական ըմպելիքը: Ավելին, յուրաքանչյուր երկիր ունի տաքացրած գինու իր հատուկ բաղադրատոմսը, որոնք առաջացել են հիմնվելով տեղի խոհարարական նախասիրությունների և ավանդույթների վրա:
Տանը Գլինտվեյն պատրաստելու համար հարկավոր է հիշել մի քանի կանոններ: Նախ, պետք է ստեղծագործ լինել պատրաստման գործընթացում, քանի որ սա յուրահատուկ փոքրիկ փորձ է, որի արդյունքը լինելու է տրամադրության և ֆանտազիայի արտացոլումը և մարմնացումը:
Գլինտվեյն գինու ամենատարածված բաղադրատոմսը բավականին պարզ է: Վերցվում է մեկ բաժին կարմիր կիսաքաղցր գինի 200 մլ, դարչինի 1 ձող, 200 գ հատիկավոր շաքար, կամ դրա փոխարեն 1 գդալ մեղր, մի քանի սև պղպեղ և մի քիչ մեխակ: Ըմպելիքը կարող է ուղեկցվել նարնջի, խնձորի կամ կիտրոնի մի քանի շերտերով: Ցանկության դեպքում կարելի է ավելացնել ազնվամորի կամ հապալաս: Խորհուրդ է տրվում կաթսայում նախորոք տաքացրած գինու մեջ լցնել համեմունքները: Ընդ որում պետք չէ գինին հասցնել եռման աստիճանի, բավական է տաքացնել այն, իսկ համեմունքների հետ խառնելուց հետո թողնել հինգ րոպե թույլ կրակի վրա: Եվ այսքանով Գլինտվեյնը պատրաստ է: Լավ հյուրընկալողը տաքացրած գինու հետ կմատուցի նաև որոշակի նախուտեստներ: Կոճապղպեղով թխվածքը, շտրուդելը, պանիրը կամ սառը միսը լավագույնս են համապատասխանում դրան: Գլինտվեյլը պետք է մատուցել բարձր ապակե բաժակների մեջ: Եթե կարմիր գինի չունեք ապա Գլինտվեյն պատրաստելու համար կարելի է օգտագործել նաև սպիտակ գինի: Այս դեպքում որպես նախուտեստներ համապատասխանում են ծովամթերքը կամ սուշին: Այսինքն կարելի է ասել, որ Գլինտվեյն գինի պատրաստելը կարող է լինել ցանկացած մարդու սեփական գլուխգործոցը, միայն թե պահպանելով իսկական տաքացրած գինի պատրաստելու հիմնական կանոնները:
Նյութը հրապարակման պատրաստեց Կամո Խաչիկյանը
