Ռուս սահմանապահներն իրենց ներկայությունն ավելի են մեծացնում․ Մեղրիի քաղաքապետ

ArmDaily.am-ի հետ զրույցում Սյունիքի մարզի Մեղրու համայնքապետ Մխիթար Զաքարյանն, անդրադառնալով օրեր առաջ կառավարության կողմից ռուս խաղաղապահ զորքերին անհատույց տարածքներ տրամադրելուն Մեղրիի համայնքում, ասաց, որ ռուսական ուժերը մեծացնում են իրենց ներկայությունը Սյունիքում։

«Իրենց ներկայությունը մեծանում է մեզ մոտ։ Այդ տարածքները տրամադրել են, որպեսզի նոր զորամաս կառուցեն։ Հայ-իրանական սահմանը ռուս սահմանապահներն են պահպանում և հիմա իրենց ներկայությունն ավելի մեծացնում են, զգալի են դարձնում, տարածք են ուզել, որպեսզի ավելի լայն տարածքով ներկայացված լինեն»։

Մեր հարցին, արդյո՞ք հնարավոր է, որ Սյունիքում էլ Արցախի սցենարը կրկնվի, որ Սյունիքն անջատվի կենտրոնական Երևանից ու ավելի շատ ռուսների ազդեցության գոտի դառնա, Զաքարյանն ասաց, որ այս իշխանության մնալու դեպքում ամեն վտանգ էլ հնարավոր է․ «Նույնիսկ այնպիսի բաներ են հնարավոր, որ չենք էլ կարող ենթադրել այս պահին՝ ամեն վատ բան էլ կարող է լինի։ Բայց միայն այս իշխանության մնալու դեպքում, թե չէ մնացած առումով ռուսների ռազմական ներկայությունը ինչքան շատ լինի, այնքան մեր անվտանգության բաղադրիչները ավելանում են։ Ես այդպես եմ կարծում»։

Ինչ վերաբերում է ԱՄՆ-ի հյուպատոսարանի կառուցմանը Մեղրիում, համայնքապետն ասաց, որ մամուլից է այդ տեղեկություններին ծանոթացել, սակայն այդպիսի տեղեկատվության չի տիրապետում և ԱՄՆ դեսպանի այցելության ու նրա հետ հանդիպման ժամանակ նման հարց բացարձակ չի քննարկվել։

Հունիսի 7-ին նախատեսված է «Հայաստան» դաշինքի առաջին համար Ռոբերտ Քոչարյանի այցելությունը Մեղրի, ինչի վերաբերյալ Զաքարյանն ասաց, որ համակիրներն ու ինքը սպասում են այդ այցին, ուզում են պետականամետ խոսք լսել։

«Դա քարոզարշավի առաջին օրն է ու մեզ համար ինչ-որ առումով պատվաբեր էլ է, որ քարոզարշավի պաշտոնական բացումը մեր համայնքից է սկսվում»,-նշեց Զաքարյանը։

Հայկա Ալոյան