Զապորոժիեի «Մոտոր սիչ»-ը կաշխատի թուրքական ռազմական արդյունաբերության համար
ՀԱՍԱՐԱԿՈՒԹՅՈՒՆ
svpressa.ru-ն գրում է, որ Ուկրաինան շարժիչներ կմատակարարի թուրքական ATAK-2 նոր հարձակողական ուղղաթիռների համար: Այս մասին ասել է թուրքական ավիատիեզերական արդյունաբերության հեռանկարային պտուտակաշարժիչային մեքենաներ մշակող Turkish Aerospace Industries (TAI) ընկերության գլխավոր տնօրեն Թեմել Քոթիլը: Ըստ նրա` համապատասխան պայմանագրերն արդեն ստորագրված են: Այնուամենայնիվ, նա չի հստակեցրել, թե ինչ քանակի և քանի շարժիչի մասին է խոսքը: Միևնույն ժամանակ Կոտիլը Ուկրաինան անվանել է «եղբայրական երկիր» և շեշտել, որ Թուրքիան այսօր այլընտրանք չունի իր շարժիչների համար: Բացի այդ, նա վստահ է, որ պատժամիջոցների ու էմբարգոյի պատճառով ուկրաինացի մատակարարների հետ խնդիրներ չեն առաջանա, ինչպես դա հնարավոր է նոր աշխարհաքաղաքական մարտահրավերների առկայությամբ արևմտյան երկրների դեպքում: Այն փաստը, որ թուրքերը մտադիր են իրենց խոստումնալից ծանր ուղղաթիռները հագեցնել ուկրաինական շարժիչներով, առաջին անգամ հայտնի է դարձել դեռ մարտի կեսերին: Թուրքական HaberTür հեռուստաընկերության եթերում TAI ընկերության գլխավոր տնօրենը հայտարարել էր, որ ATAK 2-ը ուկրաինացի գործընկերներից կստանա երկխցային տուրբոռեակտիվ 2,5 հազար ձիաուժ հզորությամբ շարժիչներ: Այլ մանրամասներ նա չի հայտնել: Ներառյալ այն, թե ո՞ր ուկրաինական ընկերությունն է այդ շարժիչները մատակարարելու Թուրքիա: Այնուամենայնիվ, այդ հարցին կարող է լինել միայն մեկ պատասխան. դա «Մոտոր սիչ» օդանավային շարժիչներ արտադրող գործարանն է, որի շուրջ վերջերս բազմաթիվ նիզակներ են կոտրվել: Ուկրաինայում այն շարժիչ արտադրող միակ ձեռնարկությունն է:
Զենքի համաշխարհային առևտրի վերլուծության կենտրոնի (CAMTO) տվյալներով նոր ATAK 2 ուղղաթիռը ստեղծում է TAI թուրքական ավիաշինական ասոցիացիան Թուրքիայի զինված ուժերի պատվերով: Մշակումը շարունակվում է 2019 թվականից: Ենթադրվում է, որ ստեղծվելիք ուղղաթիռը կլինի բարձր թռիչքային բնութագրերով մանևրվող հարվածային ուղղաթիռ, որը հագեցած կլինի թիրախի հայտնաբերման, էլեկտրոնային պատերազմի համակարգերի, նավիգացիայի, կապի և սպառազինության ժամանակակից այնպիսի տեխնոլոգիաներով, որոնք ունակ են կրելու մեծ քանակությամբ մարտական բեռ և գործելու դժվար պայմաններում: Փաստացի, ըստ էության, կլինի նույն դասի ուղղաթիռ, ինչպիսիք են ամերիկյան AN-64 «Ապաչին»-ն ու ռուսական Mi-28NM «Գիշերային որսորդ»-ը:
Նյութը հրապարակման պատրաստեց Կամո Խաչիկյանը
