Կան մարդիկ, որ գերեվարվել են պատերազմը ավարտվելուց հետո՝ դեկտեմբերին
ՔԱՂԱՔԱԿԱՆՈՒԹՅՈՒՆ
Չնայած, որ տարբեր կառույցներ վերջին մի քանի օրերին Ադրբեջանին հորդորում են վերադարձնել հայ ռազմագերիներին, այնուամենայնիվ մեր գերիները դեռևս հակառակորդի մոտ են; Այս թեմայով զրուցել ենք իրավապաշտպան Լարիսա Ալավերդյանի հետ ։
Հարցին, թե ինչ կարող է անել ՀՀ իշխանությունը, որ չի անում՝ մեր գերեվարված տղաներին հետ վերադարձնելուն միտված Լարիսա Ալավերդյանը պատասխանել է․ «Հարցը բավականին ակտուալ է ոչ այն պատճառով, որ մինչ օրս չեն վերադարձվել մեր գերիները, այլ որովհետև կարծես թե շրջանցում են հարցը, թե ինչպես են առաջացել այդ գերիները: Ես հիմնականում կցանկանայի շեշտը դրա վրա դնել, որովհետև դրանից է հետևում, թե ինչու չեն անում հստակ, հասցեական քայլեր կամ ինչու նրանց մոտ դա չի ստացվում: Առաջինը, պետք է հիշեցնեմ, որ նոյեմբերի 9-ին, երբ ստորագրվում էր այդ փաստաթուղթը, մարտերը դեռ շարունակվում էին: Այդ ստորագրման ժամանակ մենք չենք տեսնում կետ, որ նախևառաջ դուրս բերվեն այդ տարածքներից դեռ ողջ և մարտնչող զինվորներին: Այսինքն, եթե հակիրճ, ապա ցավալիորեն պետք է ասեմ, որ տարածքները հանձնվել են դեռ ողջ, մարտնչող զինվորականների հետ: Ավելին՝ կան մարդիկ, որոնք գերության մեջ են հայտնվել պատերազմը ավարտվելուց հետո՝ դեկտեմբերին»։
Հարցին թե ինչո՞վ է պայմանավորված միջազգային հանրության, համապատասխան կառույցների անդեմ, կրավորական, ընդամենը հայտարարությունների մակարդակով արձագանքը իրավապաշտպանը ասաց, որ երբեմն լինում են շատ կոշտ արձագանքներ, երբ շահագրգիռ պետությունը բարձրացնում է այդ հարցերը, ոչ թե որպես անհասցե հայտարարություն, այլ կոնկրետ հարցը դարձնում է օրակարգային բոլոր հարթակներում․ «Երբ է լինում կոշտ արձագանք, երբ շահագրգիռ պետությունը բարձրացնում է այդ հարցերը, ոչ թե որպես անհասցե հայտարարություն, այլ կոնկրետ հարցը, դարձնում է օրակարգային բոլոր հարթակներում: Հիմա, քանի որ պետությունը ինքը չի անում դա, միջազգային հանրությունը հանդես է գալիս ընդհանուր, կոնվենցիաներից բխող, ՄԱԿ-ի կանոնադրություններից բխող հայտարարություններ: Հետո, ինչ սպասել միջազգային հանրությունից, երբ իշխանական պատգամավորը հայտարարում է, որ Ադրբեջանում շատ լավ են վերաբերվում գերիներին: Նման՝ անգամ թշնամու համար անհասկանալի դիրքորոշումները, հիմք են տալիս միջազգային հանրությանը բավարարվել կրավորական, այո, ճիշտ նշեցիք, անդեմ հայտարարություններով»։
Սոնա Գիշյան
